ШШГЕГ-ын Хэвлэл мэдээлэл, олон нийттэй харилцах төвийн дарга Х.Баясгалантай ярилцлаа.
-Хорих 409 дүгээр ангид буй хүмүүс коронавирусний халдвар авсан гэх мэдээлэл байна. Өнөөдрийн байдлаар хэчнээн хүн халдвар аваад байна вэ?
-ШШГЕГ-ын харьяа 409 дүгээр хаалттай хорих ангид өнөөдрийн байдлаар 70 хүн коронавирусний халдвар авсан нь батлагдаад байна. Эдгээрээс 18 хүнийг хорих ангийн харьяа нэгдсэн эмнэлэгт эмчилж байгаа бол үлдсэн 52-ийг нь тусгаарлан холбогдох эмчилгээг хийж байна.
-Халдвар анх хэзээ илэрсэн юм бэ?
-Тухайн халдвар илэрсэн хүнээс гуравдугаар сарын 31-ний өдөр шинжилгээ авахад эерэг гарч, маргааш нь буюу дөрөвдүгээр сарын 1-нд PCR шинжилгээгээр батлагдсан байгаа. Өмнө нь шинжилгээ авахад сөрөг гарсан ч дөрөв хоногийн дараагаас халуурч эхэлсэн юм. Өөрөөс нь асуумж авахад өнгөрсөн хугацаанд өмгөөлөгчтэйгээ уулзсан. Арав хоногийн өмнө өмгөөлөгчтэйгээ шүүх хуралд орсон байдаг. Харамсалтай нь, өмгөөлөгч нь мөн коронвирусний халдвартай нь батлагдсан байгаа.
-Нэг дор 70 хүн халдвар авсан нь өвчлөлийн голомт болох эрсдэл үүсчээ. Үүнд ямар арга хэмжээ ажиллаж байгаа вэ?
-Энд нэг зүйлийг тайлбарлаж хэлье. Иргэд хорих ангид хоригдлууд бөөнөөрөө халдвар авчээ гэж ойлгоод байгаа. 409 дүгээр анги нь ШШГЕГ-ын харьяа Цагдан хорих 461 дүгээр ангийн нэгээхэн хэсэгт байрлах хүлээлгийн байр юм. Үүнд анх удаа хорих ялаар шийтгүүлсэн болон дваж заалдах гомдол гаргаад шүүхийн тогтоол нь хүчин төгөлдөр болж ирээгүй ийм хүмүүсийг хорьдог. Шүүхийн ажиллагаа тасралтгүй яваа. Зөрчлийн болон эрүүгийн хэргээр шийтгүүлж ирж байгаа хүний тоо өдөрт 20-30-д хүрч, мөн энэ тооны хүнийг суллаж байгаа. Энэ хэрээр нөхцөл байдал эрсдэлтэй байна. Хамгийн гол нь эхний байдлаар түргэвчилсэн оношлуураар хариу нь сөрөг гарсан мөртлөө 5-7 хоногийн дараа далд, нууц үедээ байсан нь илэрч байгаа тохиолдол олон гарч байна. Тиймээс УОК хорих ангид байгаа хүмүүсийг дархлаажуулах шийдвэр гарчихаад ажиллаж байна. Харин хүлээлгийн байранд байгаа хүмүүсийг вакцинжуулах ажлыг эхлүүлсэн.
-Халдвар авсан хүмүүсийн биеийн байдал ямар байгаа вэ. Хүндэрсэн тохиолдолд хорих ангийн эмнэлэг шаардлагатай арга хэмжээг авах тоног төхөөрөмж, эмч нарын баг бий юү?
-Энэхүү боломж бүгд байгаа. ЭМЯ, УОК шат дараалсан арга хэмжээ авах зөвлөмж гаргасан. Энэхүү зөвлөмжийн дагуу холбогдох бүхий л арга хэмжээг авч байгаа. Өнөөдрийн байдлаар хүндэрсэн хүн байхгүй. Мөн ариутгал халдваргүйжүүлтийг тогтмол хийж, хуучин хоригдож байгаа хүмүүстэй шинээр ирж байгааг нийлүүлэхгүйгээр тусад нь байрлуулах зэргээр арга хэмжээг авч байна.
-Хоригдож буй 70 хүнээс халдвар илэрсэн гэлээ. Харин 409 дүгээр хорих ангийн алба хаагчид зүгээр үү?
-Хүлээлгийн байрны алба хаагчдаас одоогоор халдвар илрээгүй байна. Бүгдийг мөн шинжилгээнд хамруулж, эрсдэлээс сэргийлэх арга хэмжээг нэн тэргүүнд авсан байгаа.
У.Тэргэл
