Эх орноо хамгаалаад ир гээд явуулсан үрийг нь үхлүүт болтол нь зодож гэмтэл учруулан улмаар эмнэлэгт хүргэгдсэн ч өвчнөө даахгүй нас барсан харамсалтай хэрэг Батлан хамгаалахын салбарт ёс зүй, хүнлэг сэтгэл, хандлагын өөрчлөлт хийх цаг хэдийнэ болсон гэдгийг харуулж буй. Хал суух нэрийн дор харгислуулж, олон аав ээжийн үрс золиослогдон байж эрх мэдэлтнүүдийн анхаарлыг татаж, шийдвэр гаргах түвшинд хүрч байгаа нь даанч харамсалтай.

ЗХЖШ-аас амиа алдсан цэргийн ар гэрт АХЛАГЧ-ийн цалинтай тэнцэх хэмжээний нөхөн олговор олгож, оршуулгынх нь зардлыг гаргахаа мэдэгдсэн. Тэгвэл ахлагчийн цалин хэдэн төгрөг вэ. Монголын цэрэг, Монгол Улсын иргэний амь насыг хэдэн төгрөгөөр үнэлж байна вэ.  

Цэргийн ахлагч бол Монгол Улсын дархан хилийн аюулгүй байдлыг хангах үүрэгтэй тангараг өргөсөн алба хаагч. Тэдний үндсэн цалин ойролцоогоор 570 орчим мянган төгрөг аж. Үүн дээр цолны нэмэгдэл ороод 750-800 мянган төгрөг гар дээрээ авдаг байна.

Тэгвэл ЗХЖШ-аас АХЛАГЧ-ийн цалингийн 5 жилийн хугацаатай тэнцэх хэмжээний нөхөн олговор олгоно гэсэн. Бодож үзье. Хэрэв 800 мянган төгрөгөөр бодвол 48 сая төгрөг. Харин үндсэн цалингаар нь үржүүлж бодвол 34.2 сая төгрөг. Үүн дээр оршуулгын зардлын 3.3 сая төгрөгийг нэмбэл амиа алдсан цэргийн ар гэрт ойролцоогоор 37.5-51 сая төгрөгийн нөхөн олговор олгох нь.

Б.Лхам