Говь-Алтай аймгийн Хилийн цэргийн 0214 дүгээр ангид алба хааж байсан хоёр цэрэг харуулын даргынхаа амь насыг хөнөөгөөд галт зэвсэгтэй зугтсан ноцтой хэрэг гарсан. Энэ талаар ЦЕГ-ын Хэвлэл мэдээлэлтэй харилцах албаны дарга Б.Баатархүүгээс тодрууллаа.  

-Цэргийн ангид гарсан хэргийн ноцтой хэргийн талаар мэдээлэл өгөөч. Яг юу болсон юм бэ?

-Дөрөвдүгээр сарын 8-ны өдрийн 22.58 минутад Говь- Алтай аймгийн цагдаагийн газарт хилийн цэргийн ....дугаар ангийн постонд хүн нас барсан байна гэсэн дуудлага ирсэн. Дуудлагын дагуу аймгийн цагдаагийн газрынхан хэргийн газарт ажилласан. Тэгэхэд тус аймгийн 0214 дүгээр ангийн харуулын дарга, 34 настай  эрэгтэй буудуулан амиа алдсан байдалтай, мөн цэргийн хоёр алба хаагч галт зэвсэгтэй оргон зайлсан байж болзошгүй нөхцөл байдал үүссэн. Энэ дагуу аймгийн цагдаагийн газар, хилийн цэргийнхэнтэй хамтран гэмт хэрэг үйлдсэн байж болзошгүй сэжигтэй этгээдүүдийг эрэн сурвалжлах ажиллагааг эхлүүлээд байна. Аймгийн цагдаагийн газраас ажлын хэсэг гарсан.

-Цэргүүдийг баривчилсан гэсэн мэдээлэл яваад байна. Энэ үнэн үү?

-Худлаа мэдээлэл байна. Одоогийн байдлаар цэргүүдийн явсан маршрутыг хяналтдаа авч, байршлыг тогтоон эрэн сурвалжлах ажиллагааг ид явуулж байна.

-Айлуудын гадна байсан мотоциклыг хулгайлж зугтсан гэсэн?

-Тиймэрхүү нөхцөл байдал тогтоогдож байгаа. Гэхдээ мөрдөн шалгаж дууссаны дараа илүү тодорхой болно. Гол нь гэмт хэрэгт сэрдэгдэж байгаа этгээдүүд байлдааны галт зэвсэгтэй, сумтай хэргийн газраас зугтсан байгаа. Энэ л хамгийн аюултай. Замдаа бусдад болон өөрсдөдөө хохирол учруулахвий гэсэн болгоомжлол байна. Үүнд цагдаагийн байгууллага онцгой анхаарч ажиллаж байна.  Мөн...дугаар ангийн ойролцоо байгаа бүх айл өрх болгоомжтой байгаарай гэж захъя. Галт зэвсэгтэй этгээдүүд оргож зугтаж яваа гэдгийг ойлгоосой.

-Цэргийн ангид дарамт шахалт байсан юм болов уу?

-Юунаас болов гэх шалтгаан нөхцөлийг ярих эрт байна. Хохирол багатай баривчлах нь л юунаас илүү чухал байна.

У.Тэргэл