Коронавирусний цар тахалтай холбоотойгоор 15 хоногийн хөл хорио тогтоосон. Тэгвэл уг шийдвэртэй холбоотойгоор дархлаажуулалтыг мөн хугацаанд түр зогсоохоор болсон.

Энэ талаар ЭМЯ-ны хэвлэлийн төлөөлөгч Б.Ууганбаяр "Өдөрт бүртгэгдэж байгаа тохиолдлын болон нас баралтыг тоо сүүлийн өдрүүдэд эрчимтэй нэмэгдэх хандлагатай байсан учраас хөл хорио тогтоохоор болсон. Уг нь энэ хугацаанд дархлаажуулалтыг эрчимтэй явуулна гэж төлөвлөж байсан боловч дархлаажуулалтын үеэр хүн олноор бөөгнөх, халдвар хамгааллын дэглэм зөрчигдөх магадлалтай байсан учир түр зогсоох шийдвэр гаргасан. Энэ талаарх мэдээллийг албаныхан мөн удахгүй хүргэх болно.  Харин дархлаажуулалтын хоёрдах тунг хийлгэх хүмүүсийн хувьд хугацаа нь хэтэрч байна гэх зүйлийг асууж байгаа. Тэгвэл мэргэжлийн хүмүүсийн зөвлөж буйгаар вакцины хоорондох хугацаа зайтай байх тусмаа дархлаа тогтоох чадвар нь илүү байна. 56 хоног дотроо хийлгэхэд асуудал байхгүй" гэлээ. 

Өнөөдрийн байдлаар улсын хэмжээнд нийт 599,132 хүн дархлаажуулалтад хамрагдсан байна. Үүнээс нийслэлд эхний тунг 3697 хүн хийлгэсэн бол нийт 488,254 хүн дархлаажуулалтад хамрагджээ. Харин орон нутагт 13,253 хүн эхний тунг хийлгэж нийт 110,128 хүн вакцинжуулалтад хамрагдсан байна. 

Б.Баатар