Говь-Алтай аймгийн Зөөлөн богд уул гэдэг газраас зэвсэгтэй оргосон хугацаат цэргийн хоёр алба хаагчийг 10 цагийн орчим цагдаа, тагнуулын байгуулагынхан ямар нэгэн эрсдэлгүйгээр баривчилжээ. Галт зэвсэгтэй зугтсаны дараахан хоёр цэргийн ар гэрийнхэнтэй холбоо барьж, Говь-Алтай аймгийн Алтай суманд яаралтай ирэхийг хүссэн байна. Энэ дагуу Орхон аймгийн Баян-Өндөр сум, Ховд аймгийн Чандмань сумаас хоёр цэргийн ар гэрийнхэн ирж, биечлэн туслалцаа үзүүлснээр ямар нэгэн осол гэмтэлгүйгээр саатууллаа гэдгийг ХХЕГ-аас мэдээллээ. Мөн тус газраас хугацаат цэргийн хоёр алба хаагчийг эрүүл мэнд, амь насыг эрсдүүлэхгүйгээр барьж авах гол зорилготой байсан. Үүндээ ч хүрлээ гэж байна.

Говь-Алтай аймгийн болоод Алтай сумын удирдлагууд, цагдаа, тагнуул, хилийн байгууллагууд, хилчид гээд 100 гаруй хүний бүрэлдэхүүнтэйгээр ажиллаж цэргүүдийг баривчилжээ. Говь-Алтай аймгийн цагдаагийн байгууллага уг хэргийг үргэлжлүүлэн шалгаж, шалтгаан нөхцөлийг тогтоохоор ажиллаж эхэлжээ.

У.Тэргэл