Олон нийтийн цахим сүлжээнд Сүнээ нэрээр танигдсан иргэн Б.Сүндэръяа нэгэн УИХ-ын гишүүнтэй холбоотой ноцтой мэдэгдэл хийж, "Me Too" хөдөлгөөнийг өрнүүлэх болсноо дуулгасан.

Энэхүү хөдөлгөөн өнөөдөр олны анхаарлыг татаж, охид бүсгүйсүүд нэгдэж байна. Тухайлбал дуучин М.Нарантуяа буюу Нара тус хөдөлгөөнийг дэмжиж буйгаа мэдэгдэж, цахим сүлжээнд байр сууриа илэрхийлжээ. Тэрбээр "За тэгэхээр энэ эмэгтэйчүүдийн эсрэг хүчирхийлэл тэр дундаа "АББД" гэдэг зүйл үнэхээр эдээ бээрийг нь шахаж цэвэрлэхгүй бол энэ нийгмийн маш том ялзрал болсон байна. 

Та бидний алган дээрээ бөмбөрүүлсэн охин үрс минь, хүсэл мөрөөдлөө биелүүлж эзэмшсэн мэргэжлээрээ ажил хөдөлмөр эрхлэн амьдрал ахуйгаа цогцлоох гэсэн биш хэн нэгэн эрх мэдэлтэн, баян гаж донтоны гаж хүсэл тачаалыг хангаж байж ажил хөдөлмөр эрхлэх ёстой нийгмийг хүлээн зөвшөөрөх үү. Үгүй бол яг одоо #metoomovement-д нэгдээрэй. 

Нийгмийн эрүүл саруул иргэд бид, зүй зохистой, ёс зүйтэй хэв хэмжээт нийгмийн төлөө Б.Сүндэръяаг ч, мөн бусад ийм бусармаг байдалд доромжлон гутаагдсан бие сэтгэл санаагаар хохирсон охид эмэгтэйчүүдээ хамгаалах болно. 

Дахиж хэний ч нандин хайртай охин үр, ээж эгч, эхнэр, дүү, найз охид хүчийрхийлэлгүй нийгэмд эрх чөлөөгөө эдлэж өөрийн хүссэн хөдөлмөрөө айдас дарамтгүйгээр эрхэлдэг зөв нийгмийн төлөө Бид ТэмЦэх Болно. 

Түүнчлэн охид эмэгтэйчүүдийг айдас дарамтанд оруулж айлгаж ичээж, бие махбодь, сэтгэл санааны, бэлгийн хүчирхийлэл үйлдэгч Хүчирхийлэгч бидний өмнөөс бидний төлөө хууль санаачлан батлах үйл явдлыг нэн даруй таслан зогсоох хэрэгтэй.

Жич: Нарадаа айдас дарамтанд орж байсан өнгөрснөө хэлж сэтгэлээ нээж, болсон явдлыг чатаар ч болов илчлээрэй. 

Мэдээж хэдийгээр тэмцэл боловч ил тод үнэнийг өчиж чадахгүй нөхцөл байдалтай эмэгтэйчүүд маш олон бий. Тиймээс энэ чатны зураг адил хүний хувийн нууцыг хадгалж, эрхэм нандин чанарыг дээдлэх болно" хэмээжээ. 

Б.Баатар