“Баянзам” нүүрс тээвэрчдийн холбооны тэргүүн П.Баярхүүгээс үүсээд байгаа нөхцөл байдлыг тодрууллаа. 

-Гашуунсухайт боомтод хэчнээн автомашин хил дээр  бөөгнөрөл үүсгээд байгаа вэ. Тэнд нөхцөл байдал ямар байна?

-Шивээхүрэн, Гашуунсухайт боомтоор өдөрт 15-30 автомашиныг л хилээр нэвтрүүлж байна. Цагаан хадны наана 6 сая гаруй тонн нүүрс буулгасан тул бүх талбай нүүрсээр дүүрсэн. Тиймээс “Эрдэнэс Тавантолгой”-оос нүүрс ачсан автомашинууд Цагаан хад боомт руу орж чадахгүй ачаатайгаа гацсан байдалтай байна. Цагаан хаднаас цааш өдөрт мөн 30 автомашиныг л татаж, өнөөдрийн байдлаар 1800 орчим тээврийн хэрэгсэл хил чиглэсэн байдалтай үргэлжилсэн цуваа үүсээд байна. Жолооч нар хоол хүнс, түлшний хомсдолд орж, маш хүнд байдалд байгаа гэх мэдээллийг өдөр тутам надад ирүүлж байгаа.

-Ачаагүй ч гэлээ орон нутаг руугаа, гэр рүүгээ буцаж чадахгүй гацсан олон жолооч байна гэсэн. Ямар шалтгаанаар тэр вэ?

-Ямар ч ачаагүй хэрнээ автомашинаа манаж суугаа 2000 орчим жолооч байна. Эдгээр жолооч нарт хоёр хүндрэл учраад байна. Нэгдүгээрт, вакцины хоёр дахь тунгаа хийлгэхийг хүлээгээд гэртээ буцаж чадахгүй тээвэрчид маш их байна. Орон нутагтаа очоод хийлгэж болох уу гэхээр болохгүй гэсэн. Тиймээс тэндээ хийлгэхээр хилийн бүсэд гацаад байна. Нөгөө нэг хүндрэл нь, түлш, шатахууны хомсдол үүсээд байна. Хэзээ вакцины хоёрдахь тунг хийж, тээвэрчид хэзээ буцах нь тодорхойгүй байгаа нь байдлыг улам хүндрүүлж байна.

У.Тэргэл