Засгийн газраас эрсдэлийн зэрэглэлийн түвшинг ахиулж халдварын тархалтыг бууруулах зорилгоор 15 хоногийн хөл хорио тогтоосон. Гэсэн ч халдварын тархалт бодитой буурсангүй. Дорвитой хөл хорио болж чадахгүй байна гэж иргэд шүүмжилж буй. Эрдэмтдийн зүгээс халдварын тархалтыг хумих, бууруулах ганц арга нь вакцинжуулалтыг түргэсгэх гэж байгаа.
Уг нь хөл хорио тогтоосон хугацаанд вакцинжуулалтыг идэвхжүүлнэ гэсэн ч ярьснаасаа буцаж дархлаажуулалтыг зогсоосон. Үүнийг УОК тооцоололгүй ажилласнаас вакцины нөөц тасарсантай холбоотой гэдэг юм.
Өнөөдөр хөл хорионы зургаа дахь хоног. ЭМЯ-аас хөл хориог үргэлжлүүлэн 14 хоног сунгах санал хүргүүлэхээр зэхэж буй гэх. Энэ талаар ХӨСҮТ-ийн захирал Л.Баттөр "хөл хориог дахин 14 хоног сунгаж байж халдварын тархалтыг бууруулж чадна" гэжээ. Засгийн газар эдийн засаг эсвэл эрүүл мэндээ хамгаалах гэсэн хоёр хүнд сонголттой тулгарч 15 хоног хорих шийдвэрт хүрсэн. Хөл хориог дахин үргэлжлүүлэх боломжтой юу.
УОК-ын дэргэдэх Эрдэмтдийн зөвлөлийн гишүүн Д.Улам-Оргих "Хэрэв хүн амаа вакцинжуулахгүй бол бүгд халдварлаад сүргийн дархлаа үүсч, намдах боломжтой. Гэхдээ энэ хүртэл маш олон хүний алтан амь эрсэднэ. Нөгөө талаар 28, 45 хоногийн хөл хорио тогтоож чадвал иргэдийн хүсэж буй шиг нам дарах боломжтой гэсэн тооцоолол гарсан. Гэхдээ өнөөдөр энэ бол боломжгүй зүйл л дээ. Хаврын тариалалт, бүтээн байгуулалтын ажил гээд ид ажлын үед ингэж олон хоног хөл хорио тогтоох нь бас л хүнд. Эдийн засаг ч уналтад орох нь гарцаагүй. Вакцинжуулалтыг аль болох хурдан хийж байж төдий хэмжээний эрсдлээс сэргийлж чадна.
Өнөөдрийн тооцооллоор, 14 хоног хөл хорих, вакцинжуулалтаа нэг сарын өмнө дуусгах хоёр яг ижил үр дүнтэй харагдаж байгаа.
Уг нь хаврын ид ажил эхлэхээс өмнө ес хоногийн хөл хорио тогтоосон бол үр дүнтэй байх байсан юм" хэмээн манай сайтад өмнө нь өгсөн ярилцлагадаа онцолж байсан юм.
Хөл хорио тогтоохоос өөр аргагүйг ойлгож байна. Хамгийн гол нь үр дүнтэй байх хэрэгтэй. Вакцинаа ч хийхгүй халдварынхаа тархалтыг бууруулах нэртэй өдөр хоногийг ингэж аргацааж өнгөрөөвөл хэдэн төрийн алба хаагчид нь цуцаж, ААН-үүд нь "мод"'-оо барьж, иргэд туйлдах нь байна.
А.Сүх
Сэтгэгдэл (11)