Монгол хүний мөс чанар ихэд муудсан нь цар тахлын энэ үед ихээр мэдрэгдэж буй нь харамсалтай. Говь-Алтай аймгийн Алтай сумын Хилийн цэргийн 0214 дүгээр ангид хугацаат цэргийн алба хааж байсан хоаёр байлдагч  харуулын даргынхаа амийг хөнөөгөөд зугтсан ноцатой хэрэг гарсан. Тэднийг баривчлахын тулд хаа байсан Ховд аймгийн Чандмань сумаас М-ийн эцэг, эхийг авчирч, цэргийнхны бүгсэн ууланд аваачиж, хүүхдүүдийг нь тэдний тусламжтайгаар баривчилсан билээ. Гэвч Говь-Алтай аймгийн цагдаа, тагнуул, хилийн цэргийнхэн хэргээ бүтээсэн. Одоо хэрэггүй хэмээн хаа холоос авчирсан эцэг, эхийг нь уулын мухарт хаячихаад давхиж одсон талаар тэд гомдолтойгоор ярьсан юм. Олон км алхсаар сумын төв орсон талаараа ярьж, хүүгээ эсэн мэнд харах, ганц ч хором болов уулзахын тулд хаа холоос зорин ирсэн ч талаар болсонд эцэг, эх нь ихээхэн гомдолтой байсан юм. Үрээ гэсэн сэтгэлээр бэрхийг даван байж хаа хол уулын мухарт ирсэн ч нүдэн дээр хүүг нь өвдөглөн баривчилж, гав зүүн авч одсон нь одоог хүртэл нь сэтгэлд нь хадагдан, нүдэнд нь харагдсаар байгааг нулимс дуслуулан ярьж буй эхэд ийн хатуурхах шалтгаан юу байв. Батлан хамгаалахын сайд Г.Сайханбаяр таны албан тушаалтнуудын цэвдэг, хүйтэн сэтгэл энэ. Тиймдээ ч эр цэргийн албанд мордсон хөвгүүдийн зоригийг мохоодог биз ээ. Үүнээс сайд таны хүмүүжил, ёс зүй, албандаа хэрхэн ханддаг хандлагыг харж болох нь. Учир нь, тэд таны толь билээ.

Хамгийн сүүлд гэхэд л, саяхан коронавирусний халдварын улмаас 44 настай эрэгтэй нас барсан. Тэрбээр элэгний хатууралтай  байсан ба тухайн өдөр цусаар бөөлжин түргэн тусламжаар хоёрдугаар эмнэлэгт хүргэгдсэн байна. Тус эмнэлгийнхэн түргэвчилсэн оношлуураар шинжилгээ авахад хариу нь сөрөг гарсан ба дахин PCR шинжилгээ авчээ. Тэгснээ эмч нар нь “Одоо гэртээ харьж бай. PCR шинжилгээний хариуг харах ёстой” хэмээн шөнийн 03 цагт хүнд өвчтэй хүнийг гаргаж явуулсан байна. Хатуу хөл хорионы үед автомашин явахгүй,  унаа тэрэггүй, утас нь цэнэггүй болсон залуу шөнөжингөө алхсаар Баянхошуу дахь гэртээ арай ядан хүрсэн байна. Харин маргааш нь шинжилгээний хариу эерэг гарлаа хэмээн дуудаж эмнэлэгт хэвтүүлсэн ч хоёр хоногийн дараа  коронавирусний халдварын улмаас  амиа алдсан талаар ар гэрийнхэнд нь мэдэгдсэн байна. Цусаар бөөлжин бие нь муу байсан хүнийг шөнийн 03 цагт гарган явуулж, шөнө хаа хол алхсан нь биеийг нь туйлдуулж, өвчнийг нь улам хүндрүүлсэн хэмээн ар гэрийнхэн гомдолтой байна.

Цар тахлын хүнд энэ үед харин ч нэгнээ гэсэн сэтгэлтэй байж аюулыг давж гарах учиртай. Гэтэл эсрэгээрээ ялангуяа аврал эрэх эмч, эмнэлгийн ажилтнуудын цэвдэг хүйтэн сэтгэлийн улмаас иргэд энэ мэтээр амиа алдсаар. Өмнө эмнэлгийн тусламж гуйсаар автомашиндаа амьсгал хураасан эмэгтэй, 17-хон настай охин гээд дурдвал сэтгэл өвтгөм жишээ их.

У.Тэргэл