Монгол Улсын иргэн бүрийн ухаалаг гар утсанд дөрөвдүгээр сарын 19-ны өдөр буюу өнөөдрөөс Google болон Apple компаниас мэдэгдэл очих болно. Үүнийг та цочирдолгүй хүлээн авч, зааврын дагуу COVID-19 ERSDEL системийг гар утсандаа суулгаарай. Энэхүү апп-ыг суулгаснаар халдвар авсан хүний хавьтагч болсон эсэхээ мэдэх боломжтой болох юм.
Дэлхийн 60 гаруй улс орны 130 сая гаруй хүн ашиглаж, коронавируст халдвартай тэмцэж байгаа бөгөөд Монгол Улсын онцгой комиссоос монгол, англи хэл дээр “COVID-19 ERSDEL” нэрээр монголчуудад ашиглах боломжийг “E-Mongolia”-ийн дэмжлэгтэйгээр бүрдүүлжээ.
“COVID-19 ERSDEL” систем нь иргэдэд коронавируст халдварт өртсөн байж болзошгүй тухай мэдэгдлийг цаг алдалгүй мэдээлэх боломжийг олгох юм. Мөн коронавируст халдвартай өвчтөн болон хавьтлыг илрүүлэх, тандан судалгааны ажлыг нь хялбарчлахад үндсэн үүрэг нь оршино.
Хэрвээ та iPhone хэрэглэдэг бол үйлдлийн систем нь 12.5, 13.7 хувилбар эсхүл түүнээс хойших хувилбарууд дээр “Settings” цэсээс тохиргоо хийх боломжтой. Харин Android үйлдлийн системтэй бол Playstore -оос “COVID19 ERSDEL” аппликейшныг татаж авснаар ашиглах боломжтой.
COVID-19 ERSDEL систем хэрхэн ажилладаг вэ?
Коронавируст халдварын шинжилгээний хариу эерэг гарсан хүмүүсийн гар утсанд Улсын Онцгой комиссын мэдээллийн нэгдсэн систем болох www.eruul.gerege.mn -с найман оронтой тоо бүхий нэг удаагийн баталгаажуулах код мессежээр ирүүлнэ. Тухайн мессеж шинжилгээний хариу гарснаас хойш 4 цагийн дотор халдвар авсан иргэний гар утсанд илгээнэ.
Мессежээр ирсэн найман оронтой тоо бүхий баталгаажуулах кодоо “COVID-19 ERSDEL” системд та 24 цагийн дотор хуваалцаж, өөрт ойр байсан хүмүүст халдварт өртсөн байж болзошгүй талаарх сэрэмжлүүлгийг хүргэх болно. Энэ үед таны хувийн болон байршлын талаарх мэдээлэл “COVID-19 ERSDEL” системд хадгалахгүй мөн цааш дамжуулахгүй гэдгийг санаарай.
Энэхүү 8 оронтой тоо бүхий баталгаажуулах кодыг бусадтай хуваалцсанаар “Ковид-19” вирусийн тархалтыг бууруулах, гэр бүл, хайртай дотнын хүмүүсээ цар тахлаас хамгаалах үйлсэд хувь нэмрээ оруулах боломжтой юм.
COVID-19 ERSDEL системд юуг анхаарах вэ?
- Энэхүү систем нь Bluetooth технологийг ашиглан хэдэн минут тутамд өөрчлөгддөг, санамсаргүй тоон дарааллыг үүсгэдэг тул таны гар утасны Bluetooth асаалттай байх ёстой. Bluetooth нь асаалттай байснаар таны гар утасны цэнэгт ачаалал үзүүлэхгүй.
- Энэхүү систем нь тухайн иргэний байршлын мэдээллийг хянахгүй, цуглуулахгүй
- Таны хувийн мэдээллийг цуглуулахгүй, хадгалахгүй, дамжуулахгүй.
- Дата унахгүй
- Хэрвээ та халдвартай хүнтэй ойр байж халдварт өртсөн байж болзошгүй бол танд мэдэгдэнэ.