Сүүлийн өдрүүдэд олны танил эрхмүүдийг эрэн сурвалжилж байна гэх зурагтай мэдээллийг ЦЕГ-аас байсхийгээд л гаргах боллоо. Гэтэл эрэн сурвалжлаад байгаа хүмүүс нь гэртээ, ажил дээрээ байх юм. Намайг эрэн сурвалжлаад байгаа юм уу хэмээн гайхширч, эвгүйцэн хүлээн авч байна.

Мэдээж зүв зүгээр гэртээ суугаа нэгнийг зураг хөрөгтэй нь эрэн сурвалжилж байна гэсэн цагдаагийн бичиг гараад эхлэхээр хэн ч эвгүйцэх нь тодорхой.  Нийгэм ч цочирдон хүлээн авч, яасан юм бол гэх  эргэлзээ төрж, үнэн худал нь тодорхойгүй мэдээлэл, тайлбар хөвөрнө. Үндсэн хуульд бусдын нэр төр халдашгүй хэмээн заасан байдаг. Гэтэл цагдаа, хүчний байгууллага гэхээр л гэмт хэрэгтэн аятай зураг хөргийг нийтэд дэлгэж, цацаж буй нь бусдын нэр төрд халдсан ноцтой үйлдэл юм.

Төрийн соёрхолт, дуучин Д.Болд, “Гацуурт”-ын гүйцэтгэх захирал Л.Чинбат цаашаа хэн байх вэ. Д.Болд, Л.Чинбатдаа гол нь биш юм. Хамгийн гол нь хэнбугайн ч нэр төрд ингэж халдаж болохгүй. Үнэхээр тийм шаардлага байдаг бол цагдаа, хүчний байгууллагынхан тухайн хүмүүстэй холбогдох түмэн арга чарга  бий.

Тиймээс ЦЕГ аливаад шүүлтүүртэй хандан, бусдын нэр хүндэд ил тодоор халдахаа зогсооно уу.

У.Тэргэл