Баянзүрх дүүргийн Засаг дарга Н.Баярмөнх коронавирусээр өвчилсөн талаар бид өмнө нь мэдээлж байсан. Тэрбээр өнөөдөр цахим хуудсаараа дамжуулан коронавирусний халдвар болоод ХӨСҮТ-д нөхцөл байдал ямар байгаа талаар мэдээлэл өглөө.
Баянзүрх дүүргийн Засаг дарга Н.Баярмөнх "Би 2021 оны дөрөвдүгээр сарын 14-ний өдөр ХӨСҮТ-д ирж хэвтсэн. Тухайн үед өндөр халуурч байсан бөгөөд цээжний зураг авахуулахад уушигинд өөрчлөлт орж, гэмтсэн байсан. Өнөөдрийг хүртэл эмчилгээ хийлгэж, биеийн байдал сайжирлаа. Халуун буугаад хоёр хонож байна. Өнөөдөр эсрэг биетийн шинжилгээ өгсөн. Цээжний зураг авахуулсан. Тасгийн эмч,сувилагч, бүх ажилчиддаа талархаж буйгаа илэрхийлье. Өнгөрсөн хугацаанд биеийн байдал тааруу байсан тул мэдээлэл өгч чадсангүй.
Халдвар авснаас хойш өндөр халуурч, ихээр хөлөрдөг юм байна. Энэ нь хүнийг ихээр тамирдуулдаг. Коронавирус нь уушгийг гэмтээдэг учир эмч нар доошоо харж хэвтэхийг зөвлөсөн.
ХӨСҮТ боловсон хүчин үнэхээр мундаг юм байна. Харин барилга байгууламж нь маш мууджээ. Коронавирусний хамгийн аюултай зүйл нь хүндрэх явдал юм байна. Дөнгөж төрсөн нярайгаас эхлээд маш олон хүн өвчилж, хүндэрч ирж байна. Энэ өвчнөөр өвчилсөн хүний хувьд хэлэхэд коронавирус нь зүгээр нэг ханиад биш маш хүнд өвчин, цар тахал юм байна гэдгийг мэдэрлээ.
Хамгийн гол нь дархлаагаа дэмжих нь чухал. Манай гэр бүлийнхэнээс надаас өөр хүн өвчлөөгүй. Ажил, амьдралаа зөв зохион байгуулах нь зүйтэй юм байна. Энд хүндэрсэн хүн ирж эмчлүүлээд сэхээнд орж, үхэл амьдралтай тулах үед "Улаан" бүсийн эмч нараас өөр хэн ч ирж түүнд туслах боломжгүй нь хамгийн аймшигтай харагдаж байна. Тиймээс хүн бүр дархлаагаа дэмжиж, энэ өвчнийг даван туулах ёстой юм байна гэдгийг хэлмээр байна" гэлээ.
Б.Баатар
Сэтгэгдэл (6)