Эрүүл мэндийн яам коронавирусний талаарх ээлжит мэдээллээ хийж байна.
Эрүүл мэндийн яамны хэвлэлийн төлөөлөгч Б.Ууганбаяр "Сүүлийн 24 цагийн хугацаанд буюу 2021 оны дөрөвдүгээр сарын 21-ний өдөр нийт 10 мянга гаруй хүнд ПСР шинжилгээ хийхэд 1328 хүнээс халдвар илэрлээ. Эдгээрийн 1245 нь тохиолдол нь Улаанбаатар хотод бүртгэгдсэн бол 3 тохиолдол зөөвөрлөгдөн ирсэн байна.
Харин 80 тохиолдол нь орон нутагт бүртгэгдлээ. Тодруулбал, Архангайд 79 хүн, Баян-Өлгийд 5, Баянхонгорт 22, Булганд 9, Говьсүмбэрт 21, Дархан-Уулд 142, Дорноговьд 1, Дорнодод 16, Дундговьд 35, Орхонд 93, Өвөрхангайд 31, Сүхбаатарт 77, Сэлэнгэд 49, Төв аймагт 168, Увсад 20, Ховдод 96, Хөвсгөлд 14, Хэнтийд 28 хүн эмнэлэгт хэвтэн эмчлүүлж байна.
Сүүлийн 24 цагт 426 хүн эдгэрсэн. Ингээд нийт эдгэрсэн хүний тоо 13772 боллоо. Халдварын улмаас 3,789 хүн эмнэлэгт хэвтэн эмчлүүлж байгаагаас хөнгөн 2124, хүндэвтэр 1293, хүнд 309, маш хүнд 63 хүн байна.
Хөнгөн хэлбэрээр өвчлөн гэртээ тусгаарлагдаж байгаа 5140 иргэнд өрхийн эрүүл мэндийн төвөөс хяналт тавьж байна. Нийтдээ 3914 хүнийг гэрт нь үлдээх үү эсвэл эмнэлэгт хэвтүүлэх үү гэсэн тандалтыг хийж байгаа. Өнгөрсөн хоногт таван хүн нас барсан харамсалтай мэдээтэй. Тодруулбал, 48 настай эрэгтэй, 90, 72, 61 настай эмэгтэй бүртгэгдсэний нэг нь халдвар авсан ч өөр өвчний улмаас нас барсан. 49 настай эрэгтэй хүн ГССҮТ-д тархины гэмтлийн улмаас эмчилгээ хийлгэж байгаад нас барсан" гэлээ.
Тохиолдлын тоо нэмэгдэхийн хэрээр хүнд маш хүнд хүний тоо нэмэгдсээр байгаа учир иргэд та бүхэн халдвар хамгааллын дэглэмээ баримталж, амны хаалтаа давхарлан зүүх, гараа халдваргүйжүүлэх, олон хүнтэй газраар явахгүй байх зэргээр өөрийгөө болон хайртай дотны хүмүүсээ хамгаалаарай.
Б.Баатар