Улаанбаатар хотыг 2020 он хүртэл хөгжүүлэх ерөнхий төлөвлөгөөний дагуу хотын захиргааг Яармаг руу нүүлгэхээр болж, Хан-Уул дүүрэгт шинэ цогцолбор барих ажлыг 2018 онд эхлүүлсэн билээ. Яармагт барьж буй хотын захиргааны шинэ цогцолбор гурван блокоос бүрддэг ба улсын төсвийн 97 тэрбум төгрөгийн санхүүжилтээр боссон юм.

Нийслэлийн автомашины түгжрэлийг бууруулахын тулд авч буй арга хэмжээний хүрээнд Хотын захиргааг хотоос зайдуу байгуулахаар болж, ингэснээр хөл хөдөлгөөн 60 хувиар буурна гэсэн мэдээллийг тухайн үед өгч байсан юм. Богино хугацаанд сүндэрлэсэн тус цогцолбор Яармагт өнгө нэмж байгаа ч, хамгийн гол нь зориулалтын бусаар ашиглаж эхэлсэн ноцтой баримтууд гарч эхэллээ.

Тодруулбал, цогцолборын А блокт хотын захиргааныхан бус бизнес эрхлэгчдийг төвхнүүлж, үүнд, Монгол Улсын Ерөнхийлөгч Х.Баттулгын охин Б.Намуун, түүний нөхөр О.Тэнүүн нарын “Залуу бизнес эрхлэгчдийн зөвлөл” ТББ багтжээ. Энэхүү ТББ-нь Монгол-Солонгосын гарааны бизнес эрхлэгчдийг дэмжин ажилладаг бөгөөд БНСУ-ын Смартап ба бизнес эрхлэлтийг хөгжүүлэх хүрээлэнтэй хамтран ажиллах санамж бичигт өнгөрсөн оны сүүлчээр гарын үсэг зурсан байна.

Улсын төсвийн 97 тэрбумын хөрөнгөөр боссон тус цогцолборт ийнхүү Хотын захиргаа бус бизнес эрхлэгчид тухлах болж, ялангуяа  Төрийн тэргүүний охин, хүргэний байгуулсан ТББ голлох хэсэгт төвхнөсөн нь анхаарал татаж байгаа юм.

У.Тэргэл