Хууль, шүүхийнхэнд авлига өгч, томоохон хэргийг өөрийн хүслээр шийддэг “Хонгил”-ын өмгөөлөгч Б.Баасанцогтын бусдад мөнгө шилжүүлсэн баримт ар араасаа ил болсоор байна. Тухайлбал, Б.Баасанцогт нь ҮАБЗ-ийн нарийн бичгийн дарга А.Гансүх болоод эргэн тойрныхонд тодорхой хэмжээний мөнгийг шилжүүлжээ.

Тэрбээр А.Гансүхэд 1.230.000 төгрөгийг, эхнэр П.Золзаяа руу нь 10.650.000 төгрөгийг,  төрсөн ах А.Батхуяг руу 17. 500.000 төгрөгийг тус тус шилжүүлжээ. Үүгээр ч зогсохгүй, Цэцийн  дунд суудлын хуралдаанд орохоос татгалзаж, даргадаа хүртэл  эсэргүүцэл бичсэн Цэцийн гишүүн Ц.Нанзаддорж руу 7.000.000 төгрөг, ТЕГ-ын ажилтан П.Ганбаатар руу хоёр удаагийн үйлдлээр нийтдээ 12.000.000 төгрөгийг, Нийслэлийн Захиргааны хэргийн давж заалдах шатны шүүх болон Зам тээврийн хөгжлийн яаманд ажиллаж байсан Т.Мөнх-Оргил руу 3.600.000 төгрөгийг тус тус шилжүүлсэн  байна.

Хамгийн хачирхалтай нь,  өмгөөлөгч Б.Баасанцогт  бэлгийн дарамтад өртөөд байгаа гэх Сүнээ буюу Б.Сүндэръяа руу “Гансүхийн төлбөр” гэх гүйлгээний утгатайгаар 850.000 төгрөгийг шилжүүлсэн нь гайхшлыг төрүүлж байна. Гансүх гэдэг нь ҮАБЗ-ийн нарийн бичгийн дарга гэдэг нь бараг л тодорхой. Тэрбээр юуны төлбөрөө ийнхүү Б.Баасанцогтоор дамжуулж шилжүүлсэн нь анхаарал татаж байгаа юм.

Хавь ойрынхноо мөнгөөр тэтгэж суудаг өмгөөлөгч Б.Баасанцогт хэрхэн хөрөнгөжсөн бэ. Үүний хариулт бол, Монгол Улсын Ерөнхийлөгч Х.Баттулгын туслахаар ажиллаж байсан Моёлын Отгонжаргалын  хувьцаа эзэмшдэг “Юнайтед белаз машинери” ХХК-иас Б.Баасанцогт руу 70.000.000 төгрөг шилжүүлсэн баримт  хуулийнхны гарт оржээ. Тэгэхээр энэ бүхний санхүүжүүлэгч нь хэн бэ гэдэг нь тодорхой харагдаж байгаа юм.

У.Тэргэл