Эрүүл мэндийн яам коронавирусний талаарх ээлжит мэдээллийг хийж байна. 

Эрүүл мэндийн яамны хэвлэлийн төлөөлөгч Б.Ууганбаяр "Сүүлийн 24 цагийн хугацаанд буюу 2021 оны дөрөвдүгээр сарын 23-ны өдөр нийт 13 мянга гаруй хүнд ПСР шинжилгээ хийхэд 1263 хүнээс халдвар илэрлээ. Эдгээрийн 1144 тохиолдол нь Улаанбаатар хотод бүртгэгдсэн. Харин гурван тохиолдол нь эмнэлгээс шалтгаалах халдвар байгаа юм. Ингээд нийслэлд бүртгэгдсэн тохиолдол 25388 боллоо. 

Харин 116 тохиолдол нь орон нутагт бүртгэгдэж, 3249 болж байна. Тодруулбал, Ховд 1, Завхан 46, Хөвсгөл 4, Дархан 16, Орхон 5, Булган 1, Сэлэнгэ 2, Баянхонгор 3, Төв 7, Говьсүмбэр 1, Дундговь 7, Сүхбаатар 8, Өвөрхангай 12, Хэнтий 3 тохиолдол бүртгэгдлээ. Монгол Улсад нийт бүртгэгдсэн тохиолдол 29219 боллоо.

Нэг харамсалтай мэдээ дуулгахад өнгөрсөн 24 цагт таван хүн нас барлаа. Коронавирусний шалтгаант нас баралт 74 боллоо. 

Харин 487 хүн эдгэрч эмнэлгээс гарсан байна. Ингээд эдгэрсэн хүмүүсийн тоо 14745 боллоо. 

Одоогоор 4311 хүн эмнэлэгт хэвтэн эмчлүүлж байгаагаас биеийн байдал, маш хүнд-74, хүнд-345, хүндэвтэр-1375, хөнгөн-2517 хүн байна. 

Тохиолдлын тоо нэмэгдэхийн хэрээр хүнд маш хүнд хүний тоо нэмэгдсээр байгаа учир иргэд та бүхэн халдвар хамгааллын дэглэмээ баримталж, амны хаалтаа давхарлан зүүх, гараа халдваргүйжүүлэх, олон хүнтэй газраар явахгүй байх зэргээр өөрийгөө болон хайртай дотны хүмүүсээ хамгаалаарай. Мөн танд ямар нэгэн шинж тэмдэг илэрвэл яаралтай өрхийн эмнэлэгтээ хандахыг зөвлөлөө. 

Б.Баатар