Өнөөдөр коронавируст халдвараар 1224 хүн өвчилж, дөрвөн хүн амиа алдсан харамсалтай мэдээтэй байна. Коронавирусээр өвчилсөн нэгэн ээж "би өвчилвөл эргэн тойрны хайртай бүх хүмүүс өвчилдөг" тухай өөрийн цахим хуудастаа бичиж, гэртээ байхыг уриалжээ.

Тэрбээр "Эмчилгээний тав дахь өдөр. Охин минь сульдуу хэвээрээ унтаад л байна. Уг нь дусал хийж байхад унтахгүй байх заавартай. Гэсэн ч нөгөө муухай вирусыг биеийнх нь дархлаа давж дийлэхгүй байгаа бололтой. Бүтэн хоёр жил хөл хорионд байж хичээл сургуульдаа ч яваагүй гэртээ байсан үрээ ингээд эмнэлгийн орон дээр хэвтүүлчихдэг гэж өөрийгөө буруутгах. Би өвдөхөд би ганцаараа өвддөггүй хайртай нялх үрс минь ч цуг өвдчихдөг ёстой л муухай вирус юм даа Корона чи. Бид хоёрын хэвтэж байгаа эмнэлэгт 1.5 сартайгаас 16 насны 20 гаруй хүүхэд мөн хэвтэн эмчлүүлж байгаа юм байна. Хүүхдийн дархлаа хурдан сэргэдэг л гэнэ. Энэ бол эмчийн зүгээс бид хоёрт өгч байгаа сэтгэл тайвшруулалт. Томчууд бид бас ч гэж вакцинжуулалтын эхний тундаа хамрагдчихсан байсан. Эхний тунгаа хийлгэсэн бол хөнгөн өвдөж байна гэсэн үгэнд итгэж тайвшрах. Харин үрс минь ямар ч вакцин дархлаажуулалтад хамрагдаагүй байсан шүү дээ гэж бодохоор айдас нэмэгдээд л явчих юм. Хурдан эдгээсэй үр минь. Гэртээ байцгаая" гэжээ.

Дэлхий нийтээр цар тахлын нөхцөл байдал хүндэрч байгаа энэ үед иргэн бүр хичээж, дархлаагаа дэмжиж хөл хорионы үеэр гэртээ байж, хамтдаа үр дүнд хүрцгээе.