Манай улсад 2012 оноос ЮНЕСКО-гийн дэмжлэгээр Увс, Баян-Өлгий, Ховд, Хөвсгөл зэрэг 4 аймгийн 10 суманд community radio буюу хүйн радионууд FM долгионы хуваариар дуу хөгжим мэдээ мэдээлэл түгээж үйл ажиллагаагаа эхэлж байсан бол өнгөрсөн жилээс цахим орчинд мэдээллээ түгээж эхэлжээ.
Хүйн радио нь сумын иргэд сайн дураараа ажиллуулдаг, иргэдийн оролцоонд тулгуурладаг, хэл соёл, зан заншил шашин тодорхой нэг нутаг дэвсгэрт оршин суудаг зэрэг өөр хоорондоо ямар нэг байдлаар хүйн холбоотой хүмүүсийн нийтлэг ашиг сонирхолд үйлчилж, тэдгээр иргэдийн оролцоотойгоор үйл ажиллагаагаа явуулдаг ашгийн бус хэвлэл мэдээллийн хэрэгсэл юм. Communityradio.mn –ээс дэлгэрэнгүй мэдээлэл авч болно.
Баян-Өлгийн аймгийн Баяннуур сумын “Хөлцөөтийн цуурай” хүйн радио, Улаанхус сумын “ Улаанхусын долгион”, Буянт сумын “ Хөлцөөтийн цуурай”, “Хөвсгөл аймгийн Цагаан-Уул сумын “ Хотгойдын дуу хоолой” , Улаан-Уул сумын “Шишгэдийн дуу хоолой”, Цагааннуур сумын “Тайгын аялгуу”, Ховд аймгийн Алтай сумын “Бодончийн долгион” Увс аймгийн Тэс сумын “Таван тэсийн долгион” , Зүүнговь сумын “Өгөөмөр аялгуу” хүйн радионуудын FB цахим хуудсанд нэгдэж, нутаг орныхоо цаг үеийн мэдээлэл, өв соёлоо хэрхэн хадгалж уламжилж байгаа талаарх мэдээллийг хүлээн авч байгаарай. ЮНЕСКО болон Шведийн олон улсын хөгжлийн хамтын ажиллагааны агентлагийн дэмжлэгтэйгээр ирэх сард хүйн радиогийн вебсайтууд нээлтээ хийж, дижиталд шилжиж байна. Увс аймгийн Тэс сумын Таван Тэсийн долгион радиогийн пэйж хуудсаар хүргэсэн тус багийн Ендэрт багийн малчин, өвлөн уламжлагч, хөөмийч, МУСТА Л.Мангалжавын ач охин Б.Ундармаагийн хөөмийлөхийг хүргэсэн нь маш олон үзэгчийн талархлыг хүлээгээд байгаа. Энэ бичлэгийг хүлээн авч үзнэ үү?
