Олимпын аварга, МҮОХ-ны ерөнхийлөгч Н.Түвшинбаяр багын найз болох улсын өсөх идэр начин Э.Энхбатыг хэрцгийгээр зодож, биед нь хүнд гэмтэл учруулсан. Үүний улмаас Э.Энхбат хүнд бэртэл авч ГССҮТ-ийн Сэхээн амьдруулах тасагт хэвтэн эмчлүүлж байгаад БНСУ-д эмчилгээ хийлгэхээр яаралтай  ниссэн билээ.

Харин БНСУ-ын эмч нар толгой сэгсрэн, ийм болтол нь зодно гэдэг хэмээн гайхширч байсан аж. Хэрэв 1-2 хоног л хэтэрсэн бол амь насыг нь аврах найдвар үлдэхгүй байжээ.

Ар гэрийнхных нь хэлж буйгаар, өнөөдрийн байдлаар, 20-30 дусал өдөртөө залгаж, амьсгал дэмжих, уушги орлуулах зэрэг хэд хэдэн аппаратад зэрэг орж, олон төрлийн эмчилгээ хийж байгаа. Харамсалтай нь, аппаратыг нь салгавал зүрх нь шууд зогсохоор эрсдэлтэй байгаа учраас одоогоор нарийн шинжилгээ өгч чадахгүй харзнах байдалтай байгаа гэжээ. Хамгийн ноцтой нь, түүний уушги бүрэн устжээ.

Ямартай ч, Э.Энхбатын биеийнх нь байдал хүнд хэвээр, ухаан оролгүй, аппаратын тусламжтайгаар амьсгалж, амь нас нь дээсэн дөрөөн дээр хэвээр байгаа аж. Харин Н.Түвшинбаярын хувьд түүнийг Цагдан хорих 409 дүгээр ангид анх 20 хоног саатуулах шүүхийн шийдвэр гарсан ч удалгүй 10 хоногоор сунгасан юм.

Мөн түүний хувьд хорих ангийн эмнэлэгт эмчлүүлж байхдаа коронавирусний халдвар авч, өдгөө давхар эмчилгээ хийлгэж байгаа аж.

У.Тэргэл