"Сүнс" хамтлагийн дуучин Б.Лхагвасүрэн коронавирусээр өвчилжээ. Тэрбээр энэ талаараа цахим хуудснаа бичиж, олон нийтэд мэдээлэл өгсөн байна. 

Дуучин Б.Лхагвасүрэн "Ковид 19 бол ханиад биш аймшигт өвчин юм байна. Өөрт тохиолдсон явдалаасаа сийрүүлэв.

Би ковид тусаад эхэндээ мэдэхгүй даарч хөрч гэртээ 9 хоног өндөр халуурч ханиалгатай амьсгаа ойртож хахаж цацаж муудаад эмнэлэгт хүргэгдэн нийт 11 хоног эрчимт эмчилгээ хийлгэж цасан шуургатай өдөр хэвтэж цасан бороотой өдөр буюу өнөөдөр эмнэлгээс гарлаа.

Өвчний зовиур: Барьцгүй өвддөг өвчин аж. Эхэндээ хоолойн өвчин шиг хоолой хорсож нус гарч гэмгүй эхэлж улмаар өндөр халуурч амт үнэр мэдрэхгүй болж нэг өдөр нуруу бөөр нэг өдөр толгой тархи нэг өдөр булчин гээд өвдөөгүй юмгүй болдог юм байна.

Эмчилгээ: Хүн болгоных өөр өөр хүнд хүн эхэндээ дусал аналгин антибиотек цифотаксин тариулж амьсгалын 3 янзын аппаратанд орж, норов7 ман4 тан, вирусны эсрэг эм арбидол, цус шингэлэх өндөр тунтай витамин Ц, Д ууж, өдөржингөө зузаан хөнжил нэвт хөлөрч байв. Мөн уушигандаа нэвчилттэй байсан тул сэв гэм үлдээхгүйн тулд доошоо харж хэвтэж баймаар юм билээ. Ер нь биеэ муутгаж дордож байхаар эмнэлэгт хандаж хэвтэх нь чухал бөгөөд зөв зам юм.

Би ч ковидоор өвдөөгүй тусаагүй байх үедээ - "2019 онд тусаад эдгэсэн байх" хэмээн итгэж ярьж өвчин биш ханиад юм билээ гэж их додьгор бодолтой мунхаглаж явсанаа бас энд нуулгүй хэлчье!

Бид буруу бодож байна шүү!!! Таминэээ.

Ковид бол вирусны гаралтай тахал.

300 хүний ортой Нисэх яармагийн шинэ эх нярайн үндэсний төвд 800 ор зассанаар эмч сувилагч хамгаалалт удирдлага гээд олон хүмүүс 21 хоногоор ээлжлэн дунд нь 7 хоног буудалд тусгаарлагдаж гэртээ очин ээлжлэн үхлээс өвчтөнгүүдээ амьд авч үлдэх амьдралын төлөөх гардан тулаанд дайтаж байна.

Залуу хүн нялх нярай гэлтгүй дордож хэцүү байгааг биеэрээ мэдэрч хэд хонолоо. Гэр бүлээрээ хэвтэж эмчлүүлж буй улс их байна билээ.

Хүмүүс минь гэртээ хэд хоног хорионд хэн бүхний ажил бизнест мэдээж хэцүү байгаа, тэр яах вэ?!

Бид хамгийн гол нь хайртай дотны хүнээ энэ муухай өвчнөөс болж амь насын алдаж илүү олон хүн ингэж өвдөж шаналж хохирч доордож уушигандаа шархтай зовиуртай болгохгүйн тулд хүн бүр ухамсарлаж хичээж гэртээ л байхыг

Та бүхэндээ уриалж байна.

Нийт эрчимт эмчилгээ хариуцаж буй эмнэлгийн эмч сувилагч асрагч дадлагжигч хамгаалагч эмнэлгийн ажилтан алба хаагч нартаа болон гэр бүл ах дүүс найз нөхөд хамт олондоо Баярлалаа.

Энэ муухай өвчнөөр эрүүл Монгол хүн та бүү өвдөөсэй.

Жич: Өвдөж эхэлж сэжигтэй санагдснаас хойш гэртээ байж олон уулзалтуудаа цуцалж олон хүмүүстэй уулзаагүйдээ, уулзсан цөөн хэдэн хүмүүс ихэнх нь лавлахад тусаагүй байсанд маш их баяртай байна" хэмээжээ. 

Б.Баатар