Цар тахлын эрсдэлтэй монголчууд нүүр тулаад нэг жил гаруйн хугацаа өнгөрчээ. Энэ хооронд төр, засаг цаашлаад эмч, эмнэлгийн ажилтнууд, онцгой, цагдаа, мэргэжлийн хяналтынхан дийлэнх ачааг нуруундаа үүрч байгаад монголчууд талархалтай хандаж ирсэн. 

Төрдөө тангараг өргөсөн тэд нэг жил гаруйн хугацаанд зүтгэсэн ч өдгөө л туйлдаж эхлээд байна. Тиймдээ ч давагдашгүй цар тахлын өмнө хүчин мөхөсдөөд байгаа энэ цагт л туслахыг уриалж, сайн дурын ажилтнуудыг бүртгэж эхэлсэн билээ.

Эмч, эмнэлгийн байууллагад ажиллаж байсан, тэтгэвэртээ гарсан, гэртээ хүүхдээ хараад сууж байгаа, мэргэжлээсээ өөр ажил эрхэлж байгаа мэргэжлийн 150 ажилтан хүсэлтээрээ, сайн дураараа мөр зэрэгцэн зүтгэхээр болсонд Монголын ард түмэн талархаад баршгүй юм.

Хоёр настай хүүгээ эцэгт нь орхиод ирлээ, насаараа сувилагч хийлээ, голохгүй бол зүтгэхэд бэлэн, бид удмаараа эмч. Энэ сайхан мэргэжлийг эзэмшсэний хариуд одоо л зүтгэх цаг хэмээн тавуулаа ярьж суух. Зовох цагт нөхрийн чанар танигдана гэдэг. Нэг ч гэсэн эмч, эмнэлгийн ажилтны тус, дэм агаар, ус шиг хэрэгтэй байгаа энэ цагт өргөсөн тангарагтаа үнэнч байж, сайн дурынхны эгнээнд нэгдсэн цагаан нөмрөгтнүүддээ баярлалаа.     

У.Тэргэл