Улсын нэгдүгээр төв эмнэлгийн “Ковид”-ын эмчилгээний тусгаарлалтын бүсэд ажиллаж байсан сувилагч зургаан давхраас унаж амиа алдсан хэрэг гарсан. Энэ талаар ЦЕГ-ын Хэвлэл мэдээллийн төвийн дарга, цагдаагийн хурандаа Б.Баатархүү  “Унаж нас барсан гэсэн дүгнэлтийг шууд хийж болохгүй. Анх Сүхбаатар дүүргийн I хорооны нутаг дэвсгэр УНТЭ-ийн гадна өндрөөс унасан байдалтай хүн нас барсан байна гэх дуудлага мэдээлэл цагдаагийн байгууллагад ирсэн.

Дуудлага мэдээллийн дагуу тус дүүргийн цагдаагийн нэгдүгээр хэлтсийн бүрэлдэхүүн баг очиж, шалгалт хийж байна. Шалгалтын ажиллагаа үргэлжилж байна. Гэрчүүдээс тайлбар мэдүүлэг авч, шалтгаан нөхцөлийг тодруулахаар ажиллаж байна. Хохирогчийн амиа алдах болсон шалтгааныг задлан шинжилгээгээр тогтоох болно.

Хэргийн газрын үзлэгээр, зургаан давхраас унасан байж болзошгүй нөхцөл байдлыг тогтоосон. Хэвлэл мэдээллийн хэрэгслээр батлаагүй сэжиг таамаг их явж байна. Тиймээс талийгаачийн ард гэрт хүндэтгэлтэй хандах үүднээс хэргийн шалтгаан нөхцөлийг тогтоох хүртэл янз бүрийн худал мэдээлэл тараахгүй байхыг хүсье" гэлээ.

У.Тэргэл