Вакцинжуулалт эхлээд хоёр сар гаруйн хугацаа өнгөрсөн ч өнөөдрийн байдлаар 1.3 сая иргэнээ вакцинд хамруулжээ. Энэ нь чамлахааргүй үр дүн юм. Тодруулбал, тавдугаар сарын 3-ний байдлаар улсын хэмжээнд 18-аас дээш насны иргэдийн 1.037.675 буюу 50,2 хувь нь нэгдүгээр тунд, 495 мянга буюу 24 хувь нь хоёрдахь тундаа хамрагдсан байна. Хамгийн гол нь хүн амын дийлэнх амьдарч буй нийслэлчүүдийн 82 хувь нь нэгдүгээр, 43 нь хувь хоёрдахь тундаа хамрагджээ.

Монгол Улсын Ерөнхий сайд Л.Оюун-Эрдэнэ тавдугаар сарын 1-ныг гэхэд нийслэлийн иргэдийг вакцины эхний тунд, зургаадугаар сарын 1-ныг гэхэд орон нутгийн иргэдээ, 2021 оны долоодугаар сард хүн амынхаа 60 хувийн вакцинжуулна гэдгээ амлаж байв.  Тиймээс орон нутагт  вакцинжуулалтыг эрчимжүүлж, өнөөдрийн байдлаар Дархан-Уул, Орхон, Сэлэнгэ, Дорноговь аймгийн иргэд вакциндаа идэвхтэй хамрагдаж байгаа гэсэн мэдээлэл байна.

Монгол Улсын Ерөнхий сайд Л.Оюун-Эрдэнэ вакцинжуулалтын цэгээр явах үеэрээ “Бид “Covid-19-гүй зун” гээд маш том зорилт дэвшүүлсэн. Долоодугаар сарын 1-ныг гэхэд зорилтдоо хүрэхийн тулд бүх боломжоо дайчилна” гээд вакциндаа идэвхтэй хамрагдахыг иргэдэд уриалсан билээ.

У.Тэргэл