Монгол Улсад дотоодын халдварыг бүртгэснээс хойш дөрвөн удаагийн хөл хорио тогтоосон. Манай улсад тохиолдлын тоо тогтмол өссөн бол сүүлийн долоо хоногт халдварын тархалт буурч буй нь хөл хорио тогтоосны мөн вакцинжуулалт идэвхтэй хийж байгаагийн үр дүн гэдгийг Эрүүл мэндийн сайд С.Энхболд хэллээ.

Насны бүлгээр авч үзвэл, 20-49 насныхан илүү өвчилж байгаа бөгөөд хүйсийн хувьд, эрэгтэй эмэгтэй хүмүүс адил түвшинд байна гэсэн статистик дүн гарчээ. Харин 50-иас дээш насныхан “COVID-19” халдвараар өвчилбөл богино хугацаанд хүндэрч байгаа аж.

Мэргэжлийн тандалт судалгааны багийн судалгаагаар, өвчлөлийн тархалт хөл хорио тогтоохоос өмнө 1.4 хувь байсан бол сүүлийн 14 хоногт тогтмол буурч 0.84 хувьтай болсон байна.  Энэ нь хөл хорио тогтоосны үр дүн бөгөөд хэрэв тогтоогоогүй байсан бол өдөрт 3000-3400 халдварын тохиолдол илрэх эрсдэлтэй байсан гэх тооцооллыг эрдэмтэд гаргасан юм.

Манай улс 18-аас дээш насны хоёр сая 67 мянга 292 иргэнээ вакцинжуулахаар төлөвлөсөн. Өнөөдрийн байдлаар, нэг сая 536 мянган хүн вакцины нэгдүгээр тундаа хамрагджээ. Өдгөө орон нутагт вакцинжуулалт ид яваа бөгөөд Өмнөговь аймаг 87 хувиар тэргүүлж байгаа аж. Хамгийн гол нь Монгол Улс вакцинжуулалтаараа дэлхийд наймдугаарт жагсаж байна.

У.Тэргэл