Энэ жил Тулгар төрийн 2230, Их Монгол Улс байгуулагдсаны 815, Ардын хувьсгалын 100 жилийн ой тохиож буй билээ. Хэдий цар тахалтай ч баяр наадмаас өмнө тархалтыг намдааж, Үндэсний их баяр наадмыг стадиондоо тэмдэглэнэ гэж Ерөнхий сайд мэдээлсэн. Тиймээс Үндэсний баяр наадмыг зохион байгуулах комииссыг томилж, ажилдаа орсон бөгөөд найруулагчийг өнөөдөр тодруулах юм байна. Энэ жилийн хувьд Үндэсний урлагийн их театрын захирал Г.Цоггэрэл, УДЭТ-ын ерөнхий найруулагч Н.Наранбаатар, “Hero” энтертайнмент студийн захирал Б.Баатар нарын нэрс яригдаж байна. Энэ жилийн хувьд ихээхэн онцлогтой. Учир нь, түүхэн тэгш ой тохиож буй учраас тэр юм.

Найруулагч Н.Наранбаатарын хувьд 2016, 2017, 2018 оны баяр наадмын найруулагчаар гурван жил дараалан ажилласан бол Г.Цоггэрэл 2019 оны наадмын ерөнхий найруулагчаар ажилласан. Харин "Херо"  энтертайнмент студийн захирал Б.Баатар 2020 оны үзэгчгүй наадмын тоглолтыг анх удаа найруулсан юм.

Эдгээр найруулагчид тус тусын онцлогтой ч энэ жилийн хувьд түүхэн ойн жил учраас илүү ихийг наадамчин олон хүлээх нь тодорхой. Тэгээд ч цар тахал намжиж, төрийнхөө их баярыг үзэх нь хүн бүрийн хүслэн болоод буй. Тиймээс наадамчин олон “Энэ гурван найруулагчаас өөр хүн Монголд байхгүй юү” хэмээж байна. Эсвэл гурвууланг нь хамтад нь ажиллуулах санал ч гарч байгаа аж. Ямартай ч, түүхт ойн Үндэсний их баяр наадмын нээлт, хаалтын тоглолтыг “дэглэх” найруулагч өнөөдөр тодорно.

У.Тэргэл