Авто тээврийн үндэсний төвөөс автомашины азын дугаарын дуудлага худалдааг 2020 оны хоёрдугаар сараас зохион байгуулж эхэлсэн билээ.  Харин өчигдрийн байдлаар улсын төсөвт нэг тэрбум, 27 сая төгрөгийг төвлөрүүлээд байгаа ба энэхүү мөнгийг  “Хүүхдийн төлөө фонд”-д төвлөрүүлж, сайн үйлсийн аянд зориулах журамтай юм.

2020 оны арванхоёрдугаар сарын 30-ны өдөр Засгийн газар Хүүхдийн төлөө фонд байгуулж, 10 тэрбум төгрөгийн эх үүсвэрийг шийдвэрлэсэн бол Ерөнхийлөгчийн санаачилгаар “Хүүхдийн төлөө фонд”-ын үйл ажиллагааг сэргээж буйтай холбогдуулан анхны хуримтлал үүсгэх зорилгоор “Монгол соёл-монгол хүүхэд” цахим тоглолтыг телевизийн хэд хэдэн сувгаар шууд дамжуулж,300 гаруй  иргэн, аж ахуйн нэгж, байгууллагуудаас нийт 2,2 тэрбумын хандив цугларсан билээ.

Уг хандивын мөнгөөр сургууль, цэцэрлэг зэрэг хүүхдэд ээлтэй бүтээн байгуулалтыг хийнэ хэмээн ярьж байсан ч өнөөдөр хав дарсан хэвээр байгаа.

Хамгийн сүүлд гэхэд л хорт хавдрын эмчилгээнд 350 сая төгрөг яаралтай шаардлагатай болсон Н.Ананд хүүгийн зардалд тодорхой мөнгийг хандивлаач гэдэг уриалга нийгэм даяар яваад ч хэрэгсээгүй. Харин “Хүүхдийн төлөө фонд”-ын хөрөнгө энэ мэт зузаарсаар. Юуны учир хав дарсаар суугааг хэн ч мэдэхгүй байна.

У.Тэргэл