Сүүлийн өдрүүдэд цаг агаар жиндүүхэн, сэрүүхэн байгаа. Тиймээс иргэд сайжруулсан түлшийг түлэх нь ихэсч, энэ хэрээр угаартах хүний тоо эрс нэмэгджээ.

Сүүлийн хоёр хоногт бороо орж сэрүүссэний улмаас есөн дүүргийн 31 иргэн угаартаж, дөрвөн хүн нас барсан харамсалтай мэдээ байна. Угаартсан хүмүүсийн 20 нь том хүн, 11 нь бага насны хүүхэд аж.

Тухайлбал, Баянзүрх дүүргийн XVII хороонд оршин суух хаягт иргэд угаартсан байна гэсэн дуудлага 103-т ирж, эмнэлгийн ажилтнууд очиход 35-46 насны дөрвөн иргэн нас барсан, нярай хүүхэд угаартсан байдалтай байжээ.

Хамгийн гол нь, хохирогчдыг гэрийнхээ өрхийг бүтээсний улмаас угаартсан хэмээн буруутгаж байгаа ч нөгөө талаар сайжруулсан түлшний илч буурсан.

Мөн үйрмэг их болсноос иргэд ихээр хийж, уугьснаас олон хүн угаартах шалтгаан болсон хэмээж байна. Тиймээс хэний буруу байв, шалтгаан нь юундаа байв гэдгийг цагдаагийн байгууллагаас шалгаж эхэлжээ. 

У.Тэргэл