УБТЗ-ын дарга Д.Жигжиднямаа ажлаас чөдөөлөгдөх өргөдлөө 2021 оны 2 сарын 8-нд өгчээ. Тэрээр өргөдөлдөө “Миний бие 2020 оны арваннэгдүгээр сараас хойш өнөөдрийг хүртэл эрүүл мэндийн шалтгааны улмаас ХБНГУ-д эмчилгээнд хамрагдаж, эмчилгээ цаашид үргэлжлэх шаардлагатай болсон. Үүний улмаас албан үүргээ гүйцэтгэх боломжгүй боллоо.
Иймд миний хүсэлтийг хүлээн авч УБТЗ-ын даргын үүрэгт ажлаас чөлөөлж өгнө үү” гэжээ. Энэ дагуу ЗТХ-ийн дэд сайд, УБТЗ ХНН-ийн Ерөнхий хорооны орлогч дарга Ж.Бат-Эрдэнэ УБТЗ ХНН-ийн Ерөнхий хорооны дарга, “Ороссын төмөр зам” НХН-ийн ерөнхий захирлын нэгдүгээр орлогч Сергей Алексеевич Павловт 2021 оны 2 сарын 22-нд албан бичиг илгээжээ. Түүндээ "Д.Жигжиднямаагийн өргөдлийг хүлээж авлаа.
Тэрээр эрүүл мэндийн хувьд цаашид ажил хариуцах боломжгүй болсноо мэдэгдлээ.
УБТЗ ХНН-ийн Ерөнхий хорооны Монголын талаас УБТЗ-ын даргад Г.Сэрээнэндоржийг санал болгож байна. Ойрын үед хамтарсан уулзалт зохион байгуулж, энэ талаар хэлэлцэхийг санал болгож байна" гэжээ. Мөн 2021 оны 2 сарын 26-нп АТГ-ын дарга З.Дашдаваа Хувийн ашиг сонирхлын урьдчилсан мэдүүлгийг хянасан тухай албан бичгийг ЗТХ-ийн дэд сайд, УБТЗ ХНН-ийн Ерөнхий хорооны орлогч дарга Ж.Бат-Эрдэнэд явуулсан байна.
Үүнд “Г.Сэрээнэндоржийг тухайн албан тушаалд томилоход ашиг сонирхлын зөрчил үүсэх нөхцөл байдал одоогоор тогтоогдоогүй байна" гэсэн байдаг. Г.Сэрээнэндоржийн хувьд 2012-2014 онд УБТЗ-ын ерөнхий инженер-даргаар ажиллаж байв.
Тэгэхдээ Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 8 дугаар зүйлийн 8.2, 47 дугаар зүйлийн 47.1, 19 дүгээр зүйлийн 19.1, 21 дүгээр зүйлийн 21.1 дэх заалтуудыг зөрчин 2013 оны 6 дугаар сарын 11-ний өдөр “Арвижих групп” ХХК-тай ОХУ-д үйлдвэрлэсэн, ТГМ23В загварын ашиглалтад явж байгаагүй, шинэ сэлгээний илчит тэргийг 816.000.000 төгрөгөөр худалдан авахаар худалдах, худалдан авах гэрээ байгуулж хууль тогтоомжоор олгогдсон эрх мэдлээ илтэд хэтрүүлсний улмаас “Арвижих групп” ХХК-иас дээрх гэрээний дагуу нийлүүлсэн ОХУ-д 1987 онд үйлдвэрлэсэн, ашиглалтын хугацаа дууссан ТГМ23В загварын сэлгээний илчит тэргийг 2014 оны 1 сарын 29-ний өдөр УБТЗ ХНН-т хүлээлгэн өгч 330 000 000 төгрөгийн буюу онц их хэмжээний хохирол учруулсан гэмт хэрэгт холбогдсон.
Шүүхээс Эрүүгийн хуулийн тусгай ангийн 266 дугаар зүйлийн 266.2 дахь хэсэгт зааснаар шүүгдэгч Г.Сэрээнэндоржийг тодорхой албан тушаал эрхлэх эрхийг 2 /хоёр/ жил хүртэл хугацаагаар хасч, 1 /нэг/ жил хорих ял шийтгэж, Эрүүгийн хуулийн ерөнхий ангийн 77 дугаар зүйлийн 77.1, Анхны ардчилсан сонгууль болж байнгын ажиллагаатай парламент байгуулагдсаны 25 жилийн ойг тохиолдуулан өршөөл үзүүлэх тухай Монгол Улсын 2015 оны хуульд зааснаар Г.Сэрээнэндоржид Эрүүгийн хуулийн тусгай ангийн 266 дугаар зүйлийн 266.2-т зааснаар оногдуулсан тодорхой албан тушаал эрхлэх эрхийг 2 жил хүртэл хугацаагаар хасч, 1 /нэг/ жил хорих ялыг өршөөн хэлтрүүлсэн байдаг.
Оросын талаас дээрх бичгүүдийн хариуг 2021 оны 3 сарын 2-нд ирүүлжээ. Тэр бичигт нь Г.Сэрээнэндоржийн нэрийг дурдаагүй, гэхдээ өөрсдөө шийдэх зөвшөөрлийг Монголын талд өгсөн гэх мэдээлэл байна.
Гэвч хоёр сар гаруйн хугацаа өнгөрсөн ч энэ талаар ямар нэг шийдэл гарсангүй. Гацав. Тэгэхээр Засгийн газар Г.Сэрээнэндоржийг энэ албан тушаалд дахин томилохгүй, өөр хүн гаргаж ирэх бололтой.
С.Сүлд
Сэтгэгдэл (9)