С.Зориг агсны амь насыг хэрцгийгээр хөнөөсөн хэрэгтэй холбоотой Ерөнхий сайд, ЗГХЭГ-ын дарга, Хууль зүй, дотоод хэргийн сайд, улстөрчид, хуульчид, талийгаачийн ойр дотныхон, хэргийн сэжигтнээр хэвээр байгаа хүмүүсийн ар гэрийнхэн гээд талцуулсан олон үйл явдал өнөөдөр хөвөрч, нийгэм тэр чигээрээ эргэлзээ, төөрөгдөлд ороод байна.  Зарим нэг эх сурвалж, гаднын захиалгатай гэдгийг хэлж байгаа ч хэргийн яллагдагч Б.Содномдаржаа, Т.Чимгээ нарыг батлан даалтад гаргаж сулласан нь ихээхэн маргаан, шүүмжлэл дагуулаад байгаа юм.

УИХ-ын гишүүн Б.Энхбаярын хувьд, шүүхийн шийдвэрт нэг зүйлд баяртай байгаа. Хэнийг ч эрүүдэн шүүж болохгүй юм байна гэдгийг ойлгосон том дохио болсон. Нэг юманд их гайхаж байна. Т.Чимгээ, Б.Содномдаржаа нар бол хүн амины гэмт хэргийн сэжигтэн одоо ч хэвээрээ. Шүүх дахиад шалга л гэж шийдсэн. Манай улсад хүн амины гэмт хэргийн сэжигтнийг гадуур шалгаж байсан тохиолдлыг би огт мэдэхгүй юм билээ. Ийм хэрэгт сэжиглэж байгаа хүмүүсийг цагдан хорьж л шалгадаг.

Хүн амины хэргийн гол сэжигтнүүдийг сул чөлөөтэй явуулдаг улс орон Монголоос өөр байхгүй хэмээсэн бол нийтлэлч Баабар С.Зоригийн амийг оросууд Эрдэнэтийн асуудлаас болж хөнөөчихлөө гэж анх хувьдаа дүгнэлт хийж, түүндээ ч итгэл үнэмшилтэй байсан. Харин эцэст нь эргэлзээ төрсөн хэмээн өөрийн үзэл бодлоо клаб-хаус дахь хэлэлцүүлэгт зочноор оролцохдоо хэлсэн билээ.

Мөн  уг хэргийн сэжигтнээр цагдан хоригдож байсан Э.Бат-Үүл “Бид С.Зоригийг алах битгий хэл бүх талаар дэмждэг байсан. С.Зориг алагдахаас сарын өмнө Албанид ардчиллын лидерийнх нь амийг хөнөөгөөд иргэний дайн болох шахсан. Тэр үед хуучин социалист лагерийн улсад иймэрхүү аллага их гарсан” хэмээсэн билээ. Энэ мэтчилэн С.Зоригийн амийг хөнөөсөн хэргийн эргэн тойронд маргаан өрнөсөөр.

Харин сэжигтнүүдийг сулласанд С.Зориг агсны гэр бүлийнхэн ямар сэтгэгдэлтэй байгааг нийгэм даяараа чих тавин чагнаж суугаа. Тиймдээ ч хилийн чанадад олон жил амьдарч буй УИХ-ын гишүүн асан, талийгаачийн төрсөн дүү С.Оюун “Монгол Улсын Засгийн газраас хэргийн материалыг бүхэлд нь төрийн нууцаас гаргаж, нээлттэй болгохоор шийдвэрлэсэн нь зөв зүйтэй алхам боллоо гэж талийгаачийн ар гэр бид үзэж байна.

Өнгөрсөн хугацаанд хэргийг төрийн маш нууцын зэрэглэлд хамруулж, шүүх ажиллагааг бүх шатанд хаалттай явуулсныг бид анхнаас нь эсэргүүцэж, энэ үндэслэлээр шүүх хурлуудад зөвхөн өмгөөлөгчөө оролцуулж, хохирогч бид оролцоогүй. Бид хэргийн материалыг нууцаас гаргахыг шаардаж, прокурор, шүүх, УИХ зэрэг төрийн байгууллагуудад удаа дараа хандаж байсан боловч аль нь ч нааштай шийдвэрлэж байгаагүй. Анхан шатны шүүхийн шийдвэр үндэслэлтэй гарсан гэдэгт ч ихээхэн эргэлзэж байгаагаа дээр дурдсан. Хэргийг илрүүлээгүйгээр барахгүй гэм зэмгүй хүмүүсийг хилсээр шийтгэсэнд бид маш их харамсдаг, цаашид ч гэсэн энэ хэргийн улмаас хэн нэгэн хэлмэгдэх ёсгүй гэсэн хатуу байр суурьтай байдаг юм” гэлээ.

Ямартай ч, Засгийн газар уг хэргийг нууцаас гаргана хэмээсэн. Хэзээ вэ. Б.Содномдаржаа, Т.Чимгээ нарыг хэрэгт холбогдолгүй хэмээн сулласан уу. Эсвэл хэргийг эхнээс нь мөрдөн шалгах уу. Ер нь тэд буруутай юу эсвэл хэлмэгдүүлсэн үү. С.Зоригийн амийг хөнөөх захиалгыг гаднаас өгсөн үү. Энэ мэт олон асуулт хүн бүрийн толгойд эргэлдэж, эцэстээ төөрөлдсөөр худал, үнэнийг ч ялгахаа байлаа. Цаашлаад хүн амины ноцтой хэргийн захиалагчийг хилийн чанадаас хайх уу. Цаг хугацаа урссаар, харин энэхүү хэрэг улам л ээдрээтэй болсоор...

У.Тэргэл