Монголын үйлдвэрчний эвлэлийн холбооноос нийгмийн даатгалын шимтгэлийн нэмэгдлийг энэ оны нэгдүгээр сарын 1-ний өдрөөс эхлэн цуцлахыг шаардаж,  Сүхбаатарын талбайд суулт зарлаж байна.

МҮЭХ-ны дэд ерөнхийлөгч С.Эрдэнэбат "Нийгмийн даатгал, ХАОАТ нийлээд 36 хувь болж нэмэгдэхээр болчихоод байна. Хоёр хувийн нэмэгдлийг маргааш УИХ-аар хэлэлцэж, нэмэгдэж магадгүй болсон учир бид өнөөдөр Сүхбаатарын талбайд суулт зарлаж байна. Үр дүнгүй, өвлөгддөггүй даатгалын шимтгэлд 36 хувийг төлөхийг бүгд эсэргүүцэж байгаа. Төрийн зарим үйлчилгээний албан хаагчид 400-500 мянган төгрөгийн цалинг хоёр хувааж авдаг. Үүнээс 36 хувийг нь хасчихаар гар дээрээ хэдэн төгрөг авахаар яаж амьдрах юм. Гэтэл 10-20 сая төгрөгийн цалин авдаг эрхмүүд шимтгэлээс чөлөөлөгдөөд байна. Төрийн албан хаагчид эмч, цагдаа нар цар тахалтай үед нүүр тулан ажилласнаараа яагаад илүү татвар төлөх ёстой гэж. Эмч, сувилагч нар 400-500 мянган төгрөгийн цалинтай. Тэд шантарч байна. 

Энэ оны нэгдүгээр сарын 1-нээс авч эхэлсэн нийгмийн даатгалын шимтгэлийг мөн хугацаанаас хойш зогсоохыг шаардаж байна. Мөн "Капитал" банкнаас авч чадахгүй байгаа 240 тэрбум төгрөгөө олж авахыг шаардаж байна. Зөвхөн энэ их мөнгөний хүүгээр төсвийн алдагдлаа нөхөх боломжтой. УИХ-ын гишүүд, ард түмнийхээ бодит амьдралтай танилц. Маргааш хуралдаа ирээгүй гишүүдийг бид эсрэг санал өгсөнд тооцож, нэрсийг нь зарлах болно" гэлээ.

Б.Баатар