Засгийн газрын өчигдрийн хуралдаанаар нийслэлээ хөгжүүлэхэд шаардлагатай асуудлын талаар хэлэлцсэн. Энэ үеэр нийслэлд бүтээн байгуулах хэд хэдэн зүйлийг хэлэлцэж тохирсон юм.

Энэ талаар хотын дарга Д.Сумъяабазар өөрийн цахим хуудастаа "Та бүхэндээ нийслэл Улаанбаатар хотоо, амьдрах орчноо гоё сайхан болгох бүтээн байгуулалтын өдрүүдийн мэндийг хүргэе.

Өчигдөр буюу 2021 оны тавдугаар сарын 19-ний өдөр Улаанбаатар хотын түүхэнд тэмдэглүүштэй үүрэг хариуцлага нэмсэн, ташуур эрчилж шилбүүрдсэн, урам зориг өгсөн, санхүүгийн гарц гаргалгааг шийдсэн онцгой шийдвэрийг хүлээн авсан түүхэн өдөр байлаа. Энэ өдөр Засгийн газрын Улаанбаатар хотын тулгамдаж буй асуудлаар сэдэвчилсэн байдлаар өргөтгөсөн хуралдаанаас нийслэл хотын түгжрэл, нийтийн тээвэр, авто замын өргөтгөлийг цогцоор нь шийдэхэд зориулж жилд 420 тэрбум төгрөгийг зарцуулах эрх олгосонд ТАЛАРХАЛ илэрхийлье. Энэ бол бидний ажлыг урагшлуулсан, дэмжсэн, үүрэгжүүлсэн, буцах замгүйгээр урагшлах боломжийг нээж, санхүүжилтийн хүндрэлийг шийдвэрлэж өгсөн онцгой хувь нэмэр юм.

Иймд Монгол Улсын маань хүн амын 50 хувь нь амьдарч, нийт эдийн засгийн 64.7 хувь нь төвлөрдөг нийгэм, эдийн засгийн төв цэг болсон Улаанбаатар хотын иргэн нэг бүрийн амьдралд бодит үр дүнгээ өгөх түгжрэлийг халж, нийтийн тээврийн төрөл нэмж, сайжруулалт хийх, авто замаа шинэчлэх их бүтээн байгуулалтын ажлыг амжилттай удирдан ажиллахаа илэрхийлье. Мөн түгжрэлгүй, хурдан шуурхай, ая тухтай, олон замын сонголттой ШИНЭ УЛААНБААТАР ХОТЫН ХӨГЖЛИЙН төлөө Та бүхнийгээ нийслэлийн 35 мянган албан хаагч бид бүхэнтэй итгэл дүүрэн хамтран ажиллахыг хүсье.

Нийслэлийн Засгийн дарга бөгөөд Улаанбаатар хотын захирагчийн хувиар миний бие мөн адил иргэн Та бүхэнтэй хийх нээлттэй уулзалтыг сар бүр товлож, хэвлэл мэдээллийн байгууллагуудад сар бүр хийж бүтээж чадсан шинэ мэдээний үр дүн танилцуулж байхаа амлая.

ТҮГЖРЭЛГҮЙ УЛААНБААТАРЫН ТӨЛӨӨ ХАМТДАА ХИЧЭЭЦГЭЭЕ, БАЯРЛАЛАА" гэжээ.