Бурхан багшийн их дүйцэн өдөр өнөөдөр тохиож байна. Энэхүү өдөр нь Бурхан эхийн хэвлийд оршсон, төгс гэгээрлийн хутгийг олсон, нирваан дүрийг үзүүлсэн гурван үйл зохиол давхацсанаараа бусад дүйчэн өдрөөс онцлогтой юм.

Энэ жил эл өдрийг “Энэрлээр нэгдэж, эвээр бүтээе” уриан доор бүх нийтээрээ тэмдэглэн өнгөрүүлж байгаа юм.

Монголчууд төдийгүй дэлхийн бурхны шашинт улс орон, ард түмэн буяныг хотол чуулганыг бүрэлдүүлэн өргөн дэлгэр тэмдэглэж байгаагаас ихэнх улс орон энэ өдрийг баярын хэмжээнд бүх нийтийн амралтын өдөр болгон нийтээрээ тэмдэглэн өнгөрүүлдэг уламжлалтай.

2500 жилийн тэртээгээс Бурхан багшийн сургаалийн хүн төрөлхтний эв санааны нэгдэл, оюуны хөгжилд оруулсан хувь нэмрийг өндрөөр үнэлж, эдүгээ ч дэлхийд олон зуун сая хүн ард энэхүү тэмдэглэлт өдрийг тэмдэглэж буй ач холбогдлыг харгалзан үзэж, 1999 оны арванхоёрдугаар сарын 15-ны өдрийн НҮБ-ын Ерөнхий Ассемблейн A/54/L59 тоот тогтоолоор Олон улсын тэмдэглэлт өдөр болгон зарласан юм.

2019 оны арванхоёрдугаар сарын 20 өдрийн УИХ-ын чуулганаар хэлэлцэн олонхийн саналаар баталж, Бурхан багшийн их дүйцэн өдрийг нийтийн баяр амралтын өдөр болсон. Ингэснээр уг өдрийг ёс суртахуунаа эрхэмлэдэг, өөрийн явдал мөрөө эргэн харах, үнэлэлт дүгнэлт өгч, сайн үйл бүхнээ дэлгэрүүлж, саар муу бүхнийг тэвчин, асрал энэрлийг үүсгэсэн, нэг нэгнээ хүндэтгэсэн, байгаль дэлхийгээ хайрласан, буяныг хотлоор хурааж, нүглийг тэвчиж сайн сайхан буянт үйлсийг дэлгэрүүлж байх боломжийг нийт лам хуварга, сүсэгтэн олон өгчээ.

Үнэн бишрэлт, чин сүжигт сүсэгтэн олон та бүхэн энэ өдөр бурхан шүтээнд тахил өргөх, эргэл мөргөл хийх, хурал ном цахимаар айлтгуулах, гэмшил наманчлагаа үйлдэх, өргөл хандив өргөх,арван хар нүглийг тэвчиж, арван цагаан буяныг хураах, нэг өдрийн сахил, мацаг, гэргийтний насан туршийн санваарийг авч сахих, эцэг эхийн ачийг санах, амьд сэрүүн байгаа бол эрүүл энх, урт удаан наслахын тухайд залбирал ерөөл үйлдэх, гомдоосон бол өршөөл уучлал гуйх, архи тамхи тэргүүтэн муу зуршлаа орхих амлалт авч баярлуулах, хэрвээ эцэг эх нас нөхцсөн аваас хойдын мөрд нь хурал ном айлтгах, бурхан шүтээн босгох, ядарсан доройд туслах, зул тахил өргөх, хилэнцэт хүнс махыг тэвчиж, цагаан хоол идэх, ядуу хоосон, өвчтэй зовлонтой, төөрөлдөн явагч хүмүүст эд зүйлсийн өглөг өгөх, эм эмчээр туслах, эрдэм мэдлэгийг түгээх, асрал, энэрэл, бодь сэтгэлийг үүсгэх, бясалгах, бурхан багшийн намтар, үлгэрийн далай, бурханы шашны сургааль номлолыг унших, ухаарах, бясалгал бүтээл хийх, маани мэгзэм тэргүүтэн тарни, уншлагыг олноор тоолох, гал ус, дээрэм тонуул, араатан дайсны аюул нүүрлэсэн хүмүүсийг айдас хүйдсийн сэтгэлээс нь ангижруулах зэрэг үйлд шамдаарай. Мөн аливаа газар зорчихдоо маскаа тогтмол зүүж, гараа угааж, хувийн ариун цэврээ чанд сахихыг уриалж байна.

Сайн үйл бүхэн арвижин дэлгэрч байг ээ.