Зээлээ хугацаанд нь төлж чадаагүй 71000 иргэн, төлж дууссан ч гэлээ Монголбанкны хар жагсаалтад орсон иргэн, аж ахуйн нэгжүүдийг нэг удаадаа цагаатгана гэдгийг УИХ-ын дарга мэдэгдсэн. Цагаатгана гэдэг зээлийг тэглэх бус муу зээлийг харагдуулахгүй болгож, цаашид зээл авч, хүрд эргүүлэх боломжийг нэг удаадаа олгож буйгаа ч онцолсон.

Энэ нь олон мянган  аж ахуйн нэгж, иргэдийг баярлуулсан ч тодорхойгүй олон асуулт үлдэж байна. Тэгвэл  хар жагсаалтад орсон гээд зээл өгөхгүй байсан банкууд өнөөдрөөс зээлийг хэвийн олгоод явах уу. Ямар нэгэн шалгуур байх уу.

Монголбанкны хар жагсаалтад 300 мянган иргэн бүртгэлтэй байдаг гэдэг. Гэтэл 71000 иргэний хар түүхийг харагдахгүй болгоно гэхээр ямрыг нь оруулаад, ямар нь үлдээд байгаа вэ. Зээлээ төлж дууссан ч хар жагсаалтад хэвээр байсан олон байгууллага, иргэдийн мэдээллийг мэдээж цагаатгана.

Харин зээлээ төлж дийлэхгүйгээс энэхүү жагсаалтад орсон бол шинээр зээл авч болох уу. Энэ мэтчилэн олон асуулт хариулт нэхэж байна.  Энэ талаар Ард санхүүгийн нэгдлийн гүйцэтгэх захирал Ч.Ганхуяг “Банкны зээл аваад өнөөдөр төлж чадахгүй болсон аж ахуйн нэгж, иргэдэд засаг нь нэг удаадаа дэмжлэг үзүүлэх нь зүйн хэрэг.

УИХ-ын дарга зөв зүйтэй алхам хийсэн. Харин  хэрэгжүүлэхдээ нугалаа ер гаргаж болохгүй. Эдийн засагт том гажуудал гаргаж ирж болохгүй. Зарлахдаа ч гэсэн бодлоготой байхгүй бол маргаашаас иргэд банкны зээлээ төлөхгүй болоод явчихдаг.

Бизнес нь хэвийн яваа, зээлээ төлж байсан хүмүүст буруу сэдэл төрүүлэхгүй байх талын бүхий л арга хэмжээг  заавал авсан байх ёстой. Учир шалтгааныг нь зөв тодорхойлсон байх ёстой. Ер нь зээлийн түүх гэдэг компанийн болон хувь хүний өмч, хөрөнгө оруулалт байдаг.

Үүнд төр, засаг бодлогоо хэрэгжүүлэхдээ илүү урамшуулал байдлаар дэмжлэг олгох нь зөв зүйтэй” гэв.

МҮХАҮТ-ын Ерөнхийлөгч О.Амартүвшиний санал, санаачилга биеллээ олж, УИХ-ын дарга Г.Занданшатар таатай мэдээ дуулгалаа. Харин Монголбанк энэ талаарх мэдээллийг цэгцтэй, ойлгомжтой байдлаар иргэдэд нэг мөр өгөх хэрэгтэй байна. Тэгэхгүй бол олон хүн өнөөдрөөс банкуудад ачаалал үүсгэж зээл авахаар дугаарлаж эхэлсэн бол  Монголбанкны хар жагсаалтаас нэрийг нь хассан эсэхээ мэдэх гэсэн хүмүүс ч дараалал үүсгээд эхэлчихжээ.

У.Тэргэл