Дэлхий нийтээр коронавирусний халдвартай нүүр тулаад хоёр дахь жилтэйгээ золгож байна. Манай улсад ч нөхцөл байдал хүндэрч өдөрт бүртгэгдэх халдварын тохиолдол 1000 давж, нас баралт буурахгүй хэвээр байна.

Ковид-оор нас барсан иргэдийн тоо өнөөдөр 300 давж, хүнд оноштой иргэдийн тоо өдөрт л гэхэд 10 гаруйгаар нэмэгдэж байна. Өөрөөр хэлбэл, хүнд оноштой иргэдийн тоо нэмэгдэх хэрээр нас баралт төдий чинээ ихсэж болзошгүй юм. Уг нь сар гаруйгийн хугацаанд хөл хорио тогтоож, халварын тархалтыг хумих арга хэмжээ авсан ч энэ нь угтаа сонгууль угтсан ажил байсан бололтой. Нэр дэвшигчид дэмжигчидтэйгээ уулзах нэрээр хөдөө орон нутгаар явж “баахан” халдвар тараагаад ирсэн. Орон нутагт халдвар хэрхэн нэмэгдэж байгааг өдөр бүрийн 11.00 цагийн мэдээллээс харж болох юм.

Үүний зэрэгцээ зам тээврийн ослоор амь насаа алдах иргэдийн тоо дутахааргүй их байна. Тухайлбал, сая амралтын өдрүүдэд зам тээврийн ослоор зургаан иргэн амиа алдаж, 10 гаруй иргэн бэртэж, гэмтжээ.

Дээрх тоон дээр өдөрт ковид-оор нас барж буй иргэдийн тоог нэмбэл сүүлийн хоёр хоногт амь насаа алдсан иргэдийн тоо 20 гарах нь. Үүн дээр бусад шалтгаант ослууд нэмэгдэнэ. Гэтэл Монголчууд бид ГУРАВхан саяулаа. Хол замд яарч бүү яв. Тээврийн хэрэгслийнхээ бүрэн бүтэн байдлыг шалга, нягтла. Өөрийгөө болон хайртай хүмүүсээ хамгаалж, хурдаа тохируулж яв гэж үргэлж сануулсаар байтал хайхрамжгүй зангаасаа үүдэн зам тээврийн осолд өртөж, амиа эрсдэлд оруулж байгаа нь харамсалтай.

А.Сүх