Сонгуулийн ерөнхий хорооноос зөөврийн санал хураах битүүмжилсэн хайрцгаар Ерөнхийлөгчийн сонгуулийн санал авч эхэлсэн талаар мэдээлэл хийлээ.

СЕХ-ны дарга П.Дэлгэрнаран “Өнөөдөр урьдчилсан байдлаар зөөврийн битүүмжилсэн хайрцгаар санал хураах ажил ид явж байна.  Энэ удаагийн сонгуулиар хуулийн өөрчлөлтийн дагуу хар машинаар саналыг тоолохоос гадна гар тооллогыг 100 хувь явуулна. Мөн санал өгсөн иргэнд бэхэн тэмдэглэгээ хийнэ.

Бид Үндсэн хуулиар заагдсан сонгогчдынхоо сонгох, сонгогдох эрхийг хангах зорилгоор улаан бүсэд ажиллаж байгаа төрийн алба хаагч, тусгаарлалтад байгаа иргэдэд онцгой анхаарч ажиллалаа. Үүнтэй холбогдуулан Засгийн газрын 152 дугаар тогтоол гарч, арга хэмжээний журам боловсруулж гаргасан.

Зөөврийн хайрцгаар санал хураах ажил 09.00-20.00 цаг хүртэл явна. Энд эрүүл мэндийн шалтгаанаар саналаа өгөх хүсэлт гаргасан 18 орчим мянган иргэн, мөн цар тахалтай холбоотой эмнэлэгт хэвтэн эмчлүүлж байгаа болон бусад төрийн албан хаагчид нийлээд 7000 гаруй хүнээс санал авсан. Ингээд нийтдээ зөөврийн битүүмжилсэн хайрцгаар 25619 иргэнээс авах юм.

Өнөөдрийн байдлаар сонгуулийн 457 хэсгийн хороо ажиллаж байна. Үүнд, 3-4 баг зөөврийн битүүмжилсэн хайрцгаар сонгогчдынхоо гэрээр санал авахаар ажиллаж байна. Энд жирийн иргэн, төрийн албан хаагч, эмч, эмнэлгийн ажилтан бий. Тэдэнд зориулж 1600 гаруй тээврийн хэрэгсэл үйлчилж байна.  

Мөн гадаадад байгаа иргэдийнхээ саналыг аваад дууссан. Тодруулбал, тавдугаар сарын 30, 31-ний өдрүүдэд гадаад улсад суугаа 30 оронд 45 дипломат төлөөлөгчийн газарт салбар комисс байгуулан иргэдээс санал авах ажлыг зохион явуулсан. Нийт 7398 хүн бүртгэгдсэнээс 5618 хүн саналаа өгсөн. Энэ нь өнгөрсөн сонгуулийн ирцтэй харьцуулахад хүнд үед гадаадад суугаа иргэд идэвхтэй санал өгсөн. Цаашид гадаадад байгаа иргэд цахимаар чөлөөтэй санал өгөх боломжийг бий болгох ёстой гэж үзэж байна” гэлээ.

Б.Лхам