Эрүүл мэндийн яамнаас коронавирусний халдварын талаар ээлжилт мэдээллээ хийлээ. 

ЭМЯ-ны хэвлэлийн ажилтан Б.Ууганбаяр "Сүүлийн 24 цагт буюу зургаадугаар сарын 13-ны өдөр 10 гаруй  мянган хүнд шинжилгээ хийхэд 2,263 хүнээс халдвар илэрлээ. Эдгээрийн 1,650 тохиолдол нь Улаанбаатар хотод бүртгэгдсэн байна. Ингэснээр Монгол Улсад бүртгэгдсэн нийт халдварын тохиолдол 77,573  болж нэмэгдэж байна.

Харин 613 тохиолдол орон нутагт бүртгэгджээ. Тодруулбал, Орхон 10, Дархан 91, Хөвсгөл 17, Увс 23, Баян-Өлгий 8, Ховд 72, Завхан 15, Булган 7, Архангай 28,  Говь-Алтай 97, Баянхонгор 36, Ховд 72, Архангай 28, Булган 7, Төв аймагт 34, Өвөрхангай 45, Хэнтий 13, Сэлэнгэ 24, Дорнод 32, Сүхбаатар 22, Говьсүмбэр 8 тохиолдол бүртгэгдлээ.

Харамсалтай мэдээ дуулгахад өнгөрсөн 24 цагт найан хүн нас барж, халдварын улмаас нас барсан хүн 369 боллоо. Тэдний гэр бүл төрөл төрөгсдөд гүн эмгэнэл илэрхийлж байна.

Өнгөрсөн хугацаанд 523 хүн эдгэрч эмнэлгээс гарсан. Харин өнөөдрийн байдлаар 9323 хүн эмнэлэгт хэвтэн эмчлүүлж байгаагийн 5839 хүн нь хөнгөн, 2562 хүн нь хүндэвтэр, 766 хүн хүнд, 156 хүн маш хүнд байна. 

Тохиолдлын тоо нэмэгдэхийн хэрээр хүнд маш хүнд хүний тоо нэмэгдсээр байгаа учир иргэд та бүхэн халдвар хамгааллын дэглэмээ баримталж, амны хаалтаа зүүх, гараа халдваргүйжүүлэх, олон хүнтэй газраар явахгүй байх зэргээр өөрийгөө болон хайртай дотны хүмүүсээ хамгаалаарай.

Харин хамар битүүрэх, хоолой өвдөх, амт, үнэр мэдрэхгүй байх, хэл хурууны үзүүр хөхрөх, цээж хөндүүрлэх, 38 градусаас дээш хэм халуурах шинж тэмдэг илэрвэл мэргэжлийн эмчид заавал үзүүлэх хэрэгтэй. Иргэд дээрх шинж тэмдэгийг улирлын томуутай андуурч, өвчнөө хүндрүүлэх эрсдэл өндөр байгаа гэдгийг Эрүүл мэндийн яамаас анхаарууллаа. 

Б.Баатар