Зургаадугаар сарын дунд үеэс коронавирусний халдварын тоо буурна гэсэн эрдэмтдийн тооцоолол гарсан ч өнөөдрийн байдлаар юуны буурах. Харин ч хурдтай нэмэгдсээр байна. Ялангуяа сүүлийн 20 хоногт халдварын тоо огцом өсч, эрдэнэт хүний амь өдөрт хэдэн арваараа  эрсдэж байгаад  Эрүүл мэндийн яам, Онцгой байдлын ерөнхий газрын хамтарсан тандалтын баг ажиллаж, дүгнэлт гаргасан байна.

Харамсалтай нь, тандалтын багийн судлаачдын дүгнэлтээр коронавирусний энэхүү огцом тархалт нь төрийн шагнал гардуулсан үйл явцаас болжээ. Төрийн тэргүүн нь өдөр алгасалгүй одон, медаль гардуулж, Төв талбай хүний хөлд дарагдаж өнжсөн юм.

Тодотговол, сүүлийн 20 гаруй хоногт гэхэд л 16 мянган төрийн дээд одон, медаль гардуулжээ. Үүний 11 мянга нь "Алдарт эхийн одон" байсан бөгөөд тэдний 8700 нь одон гардсаныхаа дараа дайллага, цайллага хийсэн байна. Тэндээс коронавирусний халдвар огцом таржээ.

Ер нь бол одон медаль бүрийн ард дайллага цайллага болж, олуулаа бөөнөөрөө цуглаж, халдвар хамгааллын дэглэм зөрчсөн нь халдварын тохиолдлыг 1.5 дахин нэмэгдүүлсэн байна. Улмаар шагналын дундуур сонгууль залгаж, орон нутагт тархах үндэслэл болсон гэж дүгнэлтэд дурдсан байна.

Өдгөө манай улс хүн амынхаа 30 хувийг вакцинд бүрэн хамруулсан. Харин үлдсэн 70 хувь нь эмзэг бүлгийн, тэр дундаа хүүхдүүд байгаа юм. Хамгийн аюултай нь, коронавирусний халдварын тархалт нь 47 мянган жирэмсэн эхчүүдэд цохилт болж очсон байна. Одоогоор халдвар авсан хүмүүсийн 25 хувь нь шинж тэмдэггүй. Үлдсэн 75 хувийг эмчилж хамгаалах шаардлагатай. Харин 0.55 хувьд хүндрэл үүсч болзошгүй нөхцөл байдал үүсчээ.

Харин авууштай нь, олон талын судалгаа, мэдээллээр вакцины үр дүнд эргэлзэх шаардлагагүй болохыг тандалтын багийнхан тогтоожээ.

Иргэд хичээсээр, харин Төрийн тэргүүний баруун, солгойгүй ”тараасан” одон медаль, сонгуульдаа улайрсан улстөрчдийн үйлдэл ийнхүү халдварын тоог эрс нэмэгдүүлэхэд гол үүрэг гүйцэтгэсэн нь нэгэнт тодорхой боллоо. Харин одоо өдрөөс өдөрт нэмэгдсээр байгаа халдварын тохиолдол, нас баралтаа тоолсоор, шогширсоор суух бус дорвитой арга хэмжээ авахыг иргэд төр, засгаас шаардсаар буй юм.

У.Тэргэл