Цагаан хад гаалийн хяналтын бүс, Гашуунсухайт боомтын хил орчимд том оврын ачааны автомашинуудын дараалал үүсч, жолооч нарын эрүүл мэнд эрсдэлд ороод байгаа талаар “Баянзам тээвэрчдийн холбоо-ноос мэдээлэл хийлээ.

Тус холбооны Удирдах зөвлөлийн дарга П.Баярхүү “Та бүхний мэдэж байгаачлан Өмнөговь аймагт буюу экспортын бүсэд хөл хорионы дэглэм хэрэгжиж, "Ногоон бүс" гэгдэж яваа. Бодит байдалд сүүлийн нэг сар орчмын хугацаанд Гашуунсухайт боомтын нүүрсний таталт огцом багассан. Шалтгаан нь манайхаас гарсан тээврийн жолооч нар БНХАУ-ын талд очоод өгсөн шинжилгээний хариу нь удаа дараа эерэг гарч байгаатай холбоотой. явдал. Эерэг хариу гарах бүрд Хятадын талаас манай нүүрсний орох автомашиныг хязгаарладаг. Тодруулбал, вакцинжуулалт эхлэх үед тээврийн жолооч нар вакцины хоёр тундаа бүрэн хамрагдсан. Гэтэл хил рүү орохын өмнө Монголын талд түргэвчилсэн шинжилгээ өгөхөд сөрөг гарчихаад, БНХАУ-ын талд очоод шинжилгээ өгөхөөр эерэг гараад байна. Манай улсынх яг ямар шинжилгээ вэ. Нүүрсний экспорт явуулдаг Цагаан хад нь "Ногоон бүс" биш "Улаан бүс" болсныг өнөөдөр мэдэгдэж байна. Тиймээс эдгээрт тодорхой хариулт өгөхийг Засгийн газраас шаардаж байна” гэв.

Өнөөдрийн байдлаар, Цагаан хад бүс дотор 4000 орчим тээврийн хэрэгслийн жолооч нар, нүүрс ачаад хил рүү орох гээд жагсаж буй 1100 орчим автомашин байгаа аж.

Тус байгууллагын Тээвэрчдийн холбооны дарга Н.Ялагдашгүй  "Юуны өмнө тээвэрчид эх оронч байгааг хэлье. Тээвэрчид хэдэн юм хэлэхээр улстөржүүлчих болов уу гээд хагас жил чимээгүй тэслээ. Өчигдөрхөн та бүхэн хүний эрхийн талаар ярьж байсныг сонссон. Тээвэрчдийн эрхийг үнэхээр зөрчиж байна. Тээвэрчдийн амь нас эрүүл мэнд маш том эрсдэлд орчихоод байхад хэлэхгүй "Ногоон бүс" гээд явуулж байсан. 

Улс эдийн засгаа эрсдэлд оруулахгүй гэж бодож байгааг тээвэрчид ойлгож байгаа. Гэхдээ хүний эрүүл мэнд чухал. Тээвэрчид маань Монголын талын шинжилгээ үнэн эсэхэд эргэлзэж, гайхаж байна. Шинжилгээний будлианаас болоод тэд өнөөдөр ажлаа ч хийж чадахгүй, гэртээ ч харьж ээж, аав, үр хүүхэд, хань ижилтэйгээ уулзаж чадахгүй сууна. Шаардлагын хугацаа гурав хоног бөгөөд зургаадугаар сарын 19-ний дотор дээрх асуудлыг яаралтай шийдвэрлэхгүй бол олон зуун тээвэрчид шалаанзтай суултыг Төв талбайд хийхээ хатуу мэдэгдэж байна" гэлээ.

У.Тэргэл