Албан тушаалтанд дулдуйдаж, иргэддээ бааварладаг төрийн цагдаатай болжээ бид. Бүх нийтийн бэлэн байдлын зэрэглэлд шилжиж, олон нийтийг хамарсан хурал, жагсаал цуглаан хийхийг хориглож байх ахуйд хууль сахиулж чадаагүй атал иргэддээ хатуурхдаг. Магадгүй “төрд тангарагтай” гэдгээрээ төрийг иргэнээс хамгаалах ёстой гээд бодчихсон байдаг юм болов уу. Угтаа бол иргэнийг төрөөс хамгаалах учигтай хүмүүс шүү дээ.

Тухайлбал, саяхан “Номын баяр”-ын үеэр зохиолч С.Төмөрийг талбайгаас заамдаж, газар хэвтүүлж авч явж буй утга бүхий зураг цацагдсан. Энэ талаар иргэд цахим сүлжээгэр шуугиад эхлэнгүүт өөрсдийгөө өмөөрч цагдаагийн байгууллагаас тэр дор нь мэдэгдэл гаргасан юм. Тухайлбал, “Тухайн зохиолч эрх бүхий зөвшөөрөлгүй байсан бөгөөд цагдаагийн алба хаагчийн хууль ёсны шаардлагыг биелүүлээгүй тул олон нийтийн амгалан тайван байдлыг алдагдуулахаас урьдчилан сэргийлж, холдуулсан” гэж тайлбарласан.

Гэхдээ Номын баяр бол залуусыг урлаг соёлд уриалж, номтой нөхөрлүүлэх гэж зохион байгуулж байгаа арга хэмжээ.

Энэ өдөр зохиолч нь номоо зарж, нийтэд сонирхуулах, олныг соён гэгээрүүлэх үйлсэд хувь нэмрээ оруулахаар ирснийг нь үнэлээд үймээн тарихгүй л бол зөвшөөрчих л дөө. Ийм зэргийн зүйл дээр жаахан ухамсартай, хүнлэг байхыг иргэд чинь хүсэж байна. 

Албан тушаалтанд нэг өөр, энгийн иргэнд мөн л өөр ханддаг, дүрэм журам нь өөр үйлчилдэг болохоор иргэд чинь та бүхнийг дургүйцээд байгаа юм шүү дээ. 

А.Сүх