Дэлхий нийтээр хоёр дахь жилдээ коронавирустэй нүүр тулж байна. Анх тархаж эхэлснээсээ өөрчлөгдөж, өнгөө хувиргаад байгаа уг вирусийг дарангуйлах, урьдчилан сэргийлэх, өвчлөсөн ч хүндрэхгүй байх ганц зам нь вакцин гэдэгтэй эрдэмтэд санал нэгдэж буй. Үүнтэй холбогдуулан дэлхий нийтэд вакцинжуулалт идэвхтэй өрнөж байгаа ч вакцин сүргийн дархлаа тогтоож чадаж байна уу гэдэг асуулт эргэлзээтэй хэвээр байна. Энэ асуултад хариулахаар дэлхийн олон эрдэмтэд ажиллаж байна.

Одоогийн байдлаар манай улс хүн амынхаа 50 гаруй хувь, зорилтот бүлгийнхээ 90 орчим хувийг дархлаажуулалтад хамруулаад байгаа билээ. Мөн 16-17 насны хүүхдүүдээ Файзер вакцинд хамруулж эхлээд байна.

Зарим эрдэмтдийн зүгээс сүргийн дархлаа үүсэх гол зүйл нь дархлаажуулалт нөгөө нь өвчлөх гэж үзэж байгаа юм.

Дэлхийн зарим орнуудад вакцины гурав дахь тунг хийх асуудал яригдаад эхэлсэн бөгөөд гурав дахь тунгийн эмнэлзүйн туршилтыг Их Британид эхлүүлсэн. Мөн урд хөршид уг асуудал яригдаж эхэлсэн бөгөөд вакцины гурав дахь тунг хэзээ хүн амдаа хийх вэ гэдэг төлөвлөгөөг боловсруулж эхэлсэн гэх мэдээлэл гараад буй. Тэгвэл хойд хөрш мөн гурав дахь тунгийн асуудлыг судалж байгаа аж. Учир нь коронавирусний эсрэг вакцин тариулсан иргэдийн дархлаа нь эхнээсээ суларч байгаа тул вакцины гурав дахь тунг хийхээр төлөвлөж буйгаа мэдэгджээ.

УОК-оос вакцины гурав дахь тун гэж байхгүй талаар мэдэгдэж байсан ч хэрэв дэлхий нийтэд эмнэлзүйн туршилт нь амжилттай болбол дээрх асуудал сөхөгдөж магадгүй юм. Учир нь Эрүүл мэндийн сайд С.Энхболд энэ талаар өмнө нь дурдаж байсан бөгөөд “Зарим вакцины гурав дахь тунгийн асуудал дэлхий нийтэд судалгаанд үндэслэн гарч ирж байна. Зургаан сарын дараа гурав дахь тунг хийлгэнэ. AstraZeneca вакцин хийлгэсэн хүн гурав дахь тундаа Sputnik V хийлгэж болно. Мөн Pfizer вакцин хийлгэсэн бол Sputnik V хийлгэх гэх мэт судалгааны ажил хийж байгаа” хэмээн чуулганы нэгдсэн хуралдаанаар хэлж байсан юм.

А.Сүх