Эрүүл мэндийн яамны хэвлэлийн төлөөлөгч Б.Ууганбаяр коронавирусний дархлаажуулалтын талаар мэдээлэл өглөө. Тэрбээр “Вакцин хийлгэх нь халдвар авах эрсдэлээс хамгаална. Вакцин хийлгэсэн хүн халдвар авсан тохиолдолд биеийн байдал хүндрэх, амь насаа алдах аюулыг багасгана.

Вакцины нөлөө өндөр байгааг эрүүл мэндийн ажилтнууд хэлж байгаа. Олон улсын судалгаануудаас харахад ковид-19-ийн вакцины нөлөө 75-95 хувь, Монгол Улсад 85-95 хувийн нөлөө үзүүлж байна. Манай улсад халдварын улмаас нас барсан хүмүүсийн 95 орчим хувь нь вакциндаа хамрагдаагүй байсан бол 5 хувь нь хамрагдсан байсан. 

Одоогоор 18-аас дээш насны 300 гаруй мянган хүн вакцин тариулаагүй үлдсэн байна. Жирэмсэн эмэгтэйчүүд болон 16-17 насны хүүхдүүдийг дархлаажуулж эхэлсэн. Ямар нэг шалтгааны улмаас вакцин тариулаагүй иргэд маргаашаас эхлэн дархлаажуулалтын цэгт очиж, эмчид үзүүлэн Вероселл, Астразенека, Файзер гэх гурван төрлийн вакцинаас өөрт тохирохыг нь сонгон тариулах боломжтой.

Харин хоёр өөр вакцины тунг хольж хийлгэж болохгүй гэдгийг иргэд анхаарах хэрэгтэй. Монгол Улсын Засгийн газар, Эрүүл мэндийн яам Спутник вакциныг татан авах асуудлаар үйлдвэрлэгч талтай яриа, хэлэлцээр хийсээр байгаа. Харин яг хугацааг нь тодорхой хэлэхгүй байна. Үйлдвэрлэгчийн зүгээс Спутник вакцины II тунг хийлгэх хугацааг 21-90 хоног байна гэж зөвлөсөн. 

Архаг суурь өвчин, биеийн байдлын шалтгаанаас улбаалан вакцин огт тариулаагүй хүмүүс дээр дурдсан гурван төрлийн вакцинаас сонгож хийлгэж болно” гэлээ.

Б.Баатар