Засгийн газрын хуралдаанаар Үндэсний их баяр наадмыг цахимаар үзэгчгүй зохион явуулахаар шийдвэрлэсэн. Баяр наадмыг УДЭТ-ын ерөнхий найруулагч Н.Наранбаатар найруулж, Үндэсний урлагийн их театрын захирал Г.Цогтгэрэл продюсерлэж, Ерөнхий сайд Л.Оюун-Эрдэнийн ах найруулагч Б.Баатар зөвлөх найруулагчаар ажиллах Үндэсний баяр наадмыг зохион байгуулах комиссын зургаадугаар сарын 14-ний өдрийн шийдвэр гарсан ч "Херо" Б.Баатарыг ерөнхий найруулагчаар нь сонгожээ. 

Үндэсний их баяр наадам ойртож буй энэ үед ерөнхий найруулагчийг "Херо" Б.Баатараар сонгож өөрчилсөн нь Ерөнхий сайдаар "мотор"-дуулсан, ашиг сонирхлын зөрчилтэй байж болзошгүй гэх иргэдийн хардлагыг төрүүлээд буй юм. 

Ардын хувьсгалын 100 жилийн ойн баяр наадмыг зохион байгуулахад 10 тэрбум төгрөг зарцуулна.

Гэвч өдөрт бүртгэгдэх халдварын тоо 2000, нас баралт 10-аас буурахаа байсан, иргэд нулимсандаа “живж” байх энэ үед 10 тэрбумаар найр наадам хийх нь хэр зохимжтой вэ гэдгийг бодох л асуудал. Анх баяр наадмыг цахимаар зохион явуулна гэсэн яриа гарахаас эхлээд л иргэд цахим хуудсаараа дамжуулан ихээхэн эсэргүүцсэн. Өнөөдөр эмнэлэгт 12 мянга гаруй хүн коронавирусний халдвар авч, хэвтэн эмчлүүлж байна. Үүний 200 гаруй нь маш хүнд оноштой. Эрүүл мэндийн байгууллага нь ачааллаа дийлэхгүй эмнэлгийн тусламж үйлчилгээг тэр бүр авч чадахгүй байна. Шуудхан хэлэхэд, иргэд, эмнэлгийн салбар үнэхээр туйлдаж байна.

Энэ эгзэгтэй үед найр наадам л хийж байвал иргэдийн хүсэл сонирхол, хагацал зовлон хамаагүй юу. Хүний амь нэг, наадам олон шүү.

Ер нь өнгөрсөн жилийн үзэгчгүй наадам "клип" шиг болсон гэж шүүмжилдэг. Дээр нь иргэдээ хорьчихоод өөрсдөө 13 дугаар зуунд очиж наадсан нь энэ удаа ч мөн үргэлжлэх нь.

А.Сүх