Дархан-Эрдэнэтийн замд төмөр замын ноцтой осол гарчээ. Түлш ачсан 9 вагон, мөн ачааны вагон онхолдож, 400 тонн түлш хөрсөнд шингэх аюул нүүрлээд байна. Улаанбаатараас шуурхай баг шөнөдөө ослын газар руу очжээ.

Гамшгийн хор уршгийг арилгах шуурхай баг ослын газар ажиллаж эхлээд байна.

Дашрамд дурдахад 2018 онд Дорноговь аймгийн Цомог-Айраг өртөөний хооронд замын 747 дугаар километрийн 9-р зуутад Улаанбаатар-Сайншанд чиглэлд явж байсан суудлын галт тэрэг замаас гарч, галт тэрэгний зүтгүүр унасан. Үүний улмаас дөрвөн вагон замаас гарсан осол болж байсан.

Энэ ослын хариуцлагыг хүлээн Зам тээвэр, хөгжлийн сайд Ж.Бат-Эрдэнэ сайдын албаасаа огцорч байлаа.

Одоогийн Зам тээврийн хөгжлийн сайд Л.Халтар тэр ослын үед УБТЗ-ын Тээвэрлэлт, хөдөлгөөн хариуцсан орлогч даргаар ажиллаж байлаа. Нэг өгүүлбэрээр хэлэхэд төмөр замын тээвэрлэлт, хөдөлгөөний аюулгүй байдлыг тэр үед Л.Халтар сайд яг гардан хариуцдаг байв. Гэсэн ч улс төрийн албан тушаалтан сайд нь огцроод, тээвэрлэлтийн аюулгүй байдлыг хариуцдаг байсан тэрбээр Зам, тээврийн хөгжлийн дэд сайд болон дэвшиж байсан билээ.

С.Сүлд