Төрийн соёрхолт, МУГЖ Догмидын Сосорбарам Үндэсний их баяр наадмыг хийхийг эсэргүүцэн байр сууриа илэрхийлжээ. Тэрбээр “Хэрвээ би  энэ жил наадмын найруулагчаар ажиллахаар тохоогдсон бол шууд ажил хаяж, уран бүтээлчдийнхээ эрүүл энх амьдралыг дээдэлнэ.

Уг нь найруулагч дүү Наранбаатар, Цоггэрэл хоёрт утасдаж,  санал хүсэлтээ дуулгасан юмсан. Хүн амьд байх л чухал шүү, хэзээ ч наадаж болно. Бүх уран бүтээлчид өөрийгөө хамгаалах бүрэн эрхтэй шүү. Үндсэн хуулиар олгогдсон амьд байх, амьдрах эрхээ эдлээсэй л гэж уриалъя.

Он удаан жил бүтээж туурвихын төлөө өөрийгөө бод, өөрийгөө хайрла уран бүтээлчид ээ. Ингэж л зөвлөх байна даа. Бод, тунгаа, сайтар эргэцүүл. Нам төрөөс өмнө урлаг байсан юм шүү. Сайн чадвартай бүтээлч сэтгэгчид л төрийн мунхаглалыг сөрж чаддаг юм даа. Би ийм л хүн. Төрийн зарц, боол болсон найруулагч нараа орхи, биеэ л гамна, хайрла гэж бүх уран бүтээлчдийг өмөөрчихье. Цаг бүх талаар цөвүүн байна. Урт удаан жил туурвихаа л бод. Аав, ээж, амраг хань, алагхан үрсээ хайрла. Бас ахиад хэлье, өөрийгөө хайрла” хэмээжээ.

У.Тэргэл