Зургаадугаар сарын 28-ны даваа гарагаас 12-15 насныханд Фөйзер вакцин тарьж эхэлсэн. Эхний өдөр гэхэд хүүхдүүд вакциндаа идэвхтэй хамрагдаж, дархлаажуулалтын цэгүүдэд уртаас урт дараалал үүссэн байлаа. Өнөөдөр ч мөн энэ байдал хэвээр байна. Хүүхдүүд эцэг,эх, асран хамгаалагчийн хамт ирж вакциндаа хамрагдаж байгаа ч 4-5 цаг дугаарлаж буй нь тэднийг залхааж, бас ядрааж байгааг ар гэрийнхэн нь хэлж байна.
Өнөөдрийн байдлаар 12-15 насны 290 мянган хүүхэд Файзер вакцинд хамрагдах ба эдгээрийн 100 гаруй мянга нь нийслэлийнх аж. Мөн хүүхдүүдийг вакциндаа хамрагдахын өмнө эцэг, эхээр нь зөвшөөрсөн гэсэн цагаан хуудас бөглүүлж байгаа аж.
Вакцин тариулахаар дараалалд зогсож байгаа эцэг, эхчүүд ийн сэтгэгдлээ хуваалцлаа. Сүхбаатар дүүргийн 63 дугаар цэцэрлэгт байрлах дархлаажуулалтын цэгт дугаарлаж буй О.Наран “Манай охин 12 настай. Гадуур халдвар их байгаа учраас эцэг, эхчүүд бид гэртээ ирээд хүүхдүүддээ халдаачихвий гэж их эмээх юм.
Одоо харин вакцинжуулалт эхэлж, санаа амарлаа. Хүүхдүүд гэртээ уйдаж, дэлгэцийн хамааралтай болж байна. Тиймээс хэд хоног ч гэсэн агаарт байлгаж, хөдөө явуулах санаатай хамгийн түрүүнд вакцин тариулахаар ирлээ” хэмээж байв. Мөн Сүхбаатар дүүргийн 33 дугаар сургууль дээр дугаарлаж буй 14 настай Б охин “Би гэрийнхэнтэйгээ хөдөө явах гэсэн заавал вакцин хийлгэсэн байх ёстой гэсэн. Мөн удахгүй сургууль орох болохоор хийлгэсэн дээр гэж аав, ээжтэйгээ ярилцаад шийдсэн.
Эхний тундаа хамрагдсаны 21 хоногийн дараа хоёрдахь тундаа хамрагдах юм байна. Энэ мэдээлэл аав, ээжийн утсанд ирнэ гэсэн. Миний хувьд дэлхийн болон улсын хүүхдүүд Файзер вакцинд хамрагдаж байгаа болохоор аюулгүй гэж ойлгож байгаа. Энэ талаараа гэрийнхэнтэйгээ сайн зөвшилцсөн” гэв.
Ийнхүү 12-15 насныхан тодорхой шалтгааны улмаас вакциндаа идэвхтэй хамрагдаж байна. Харин дархлаажуулалтын цэгийг нэмэх, цагийг богиносгох, хүн хүчийг нэмэгдүүлэхийг эцэг, эхчүүд ЭМЯ-наас хүсч байна.
Мөн эцэг, эхчүүд хүүхдэдээ вакцин тариулахдаа дараах гурван зүйлийг анхаарах шаардлагатай аж. Үүнд,
-Тархи мэдрэлийн хүнд өвчтэй, унаж татдаг, архаг хууч өвчин нь сэдэрсэн тохиолдолд вакцин хийлгэж болохгүй.
-Хэрвээ хүүхэд коронавирусний халдвар авч байсан бол эдгэснээс 21 хоногийн дараа вакцинд хамрагдах боломжтой.
-Хоёр дахь тунг хийлгэсний дараа эцэг, эхийнх нь гар утсанд мессеж очих учраас заавал тусгай гэрчилгээ авах шаардлагагүй юм байна.
У.Тэргэл
