Улсын өсөх идэр начин Э.Энхбат олимпын аварга Н.Түвшинбаярт зодуулсны улмаас тархиндаа хүнд гэмтэл авч, ГССҮТ-ийн Эрчимт эмчилгээний тасагт олон хоног ухаангүй хэвтэж, улмаар БНСУ-д эмчлүүлэхээр явсан билээ. Түүний бие өнөөг хүртэл дээрдэхгүй байгаа талаар ар гэрийнхэн нь цахим хуудсаараа дамжуулан мэдээлж буй. 

Булган аймгаас сонгогдсон УИХ-ын гишүүн Ж.Бат-Эрдэнэ Э.Энхбат начины эмчилгээний зардалд дэм үзүүлж, өнөөдөр ээж болон гурван хүүхдийг нь Солонгос улс руу явуулах асуудлыг шийдвэрлэсэн байна.

Тэрбээр энэ талаараа "Долоодугаар сар. Монгол хүн бүр морь, бөхөө шинжиж, сур шагай нааддаг дэлгэр сайхан сар байдагсан. Энэ жилийн хувьд цар тахлын нөхцөл байдлаас шалтгаалан баяр наадам зохион байгуулахгүй байх шийдвэрийг Засгийн газар гаргалаа.

Наадмын тухай бодохтой зэрэгцэн Э.Энхбат начинаа эдгэрч, эрүүл болж ирээд нутгийн зон олноо, Монгол түмнээ баярлуулаасай гэж хүлээж сууна.

Тэнхлүүн явахад тэмээгээр тусалснаас тэвдэж явахад тэвнээр тусла гэж ардын сайхан зүйр үг бий. Начиныхаа эмчилгээний зардалд дэм үзүүлсэн, өнөөдөр ээж болон 3 хүүхдийг нь Солонгос улс руу явуулах асуудлыг шийдвэрлэлээ.

Энэ зураг аймаг байгуулагдсаны түүхт 80 жилийн ойн баяраар түрүүлэхэд нь утсаараа дарсан зураг. Тэр үед нутгийн хүү түрүүллээ гээд үнэхээр их баярлаж байлаа. Одоо эдгэрээд эх орондоо ирчихвэл үүнээс илүү баярлана.

Монгол бөхийн босоо цагаан хийморь, нутгийн минь уул ус ивээг" гэжээ. 

Б.Баатар