ЦУОШГ-ын Ус цаг уур, орчны судалгаа, мэдээллийн хүрээлэнгийн гадаргын ус судлалын хэлтсийн дарга С.Саранцацралт мэдээлэл өглөө. 

Тэрбээр “Энэ жилийн хувьд хур бороо нийт нутгаар тавдугаар сарын дунд үеэс орж эхэлсэн. Тав, зургаадугаар сард хур бороо элбэг байсантай холбоотойгоор манай орны ихэнх гол мөрний усны түвшин олон жилийн дундажийг давсан байгаа. Зарим гол тухайлбал, Ерөө, Туул, Дэлгэрмөрөн, Дэлтэс, Үүр, Сэлбэ, Тэрэлж, Онон, Хэрлэн, Халх зэрэг гол үерийн түвшин давж үерлэсэн. Мөн хоёр, гурав хоногийн өмнөөс Хангайн нурууны ар, өврөөс эхтэй Урд Тамир гол, Хойд Тамир гол, хөгшин Орхон, Орхон, Өврийн бадраг, Онги, Хүдэр, Хараа, Ерөө зэрэг голын үерийн түвшин одоогийн байдлаар 40-80 см давсан байдалтай байна.

Цаашид ихэнх нутгаар түр зуурын болон үргэлжилсэн бороо орох төлөвтэй байгаа тул гол мөрний усны түвшин илүү нэмэгдэнэ. Иймд ард иргэд үер усны аюулаас сэрэмжлэхийг анхаарна уу. Иргэд хэнэггүй байдлаасаа болоод өөрсдийгөө эрсдэлд битгий оруулаарай" гэв. Энэ үеэр дараах зүйлсийг онцгойлон анхаарууллаа. Үүнд,   

Гэр, хашаа, майхан зэргийг гуу жалга, голын ойролцоо барьж, суурьшихгүй байх,

Бага насны хүүхдэд тавих анхаарлаа сайжруулах,

Голын усны түвшин нэмэгдсэн үед гармаар зорчихгүй найдвартай замаар явахыг сэрэмжлүүллээ.