Ерөнхий сайд асан С.Баяр саяхан магадлангаар суллагдсан билээ. Монгол Улсын Ерөнхийлөгч асан Х.Баттулга сэнтийгээсээ буухын өмнө  зарлиг гаргаж, хэд хэдэн хүнд уучлал үзүүлсэн. Харин С.Баярт ийм хүсэлт тавьж, өргөдлөө өг хэмээсэн ч тэрбээр “Хилсээр оноосон ялыг эдлээд гарна” хэмээн зөрүүдэлсэн байдаг.

Харин эрх чөлөөтэй болсны дараахан С.Баяр твиттертээ ийнхүү жиргэжээ. Тэрбээр “Монгол жиргээ маань сайн уу. Гарах өдөр ирж, хуучин ёсоор хээр өнжлөө. Зуун жилийн зуншлага тасархай байна. Гадна дотроосоо тувт халсаар урд шөнө Улаанбаатартай золгов.

Эзгүйд ч гэлээ дэмжсээр ирсэн олонд мэхийн сөгдъе. Хар цагаан хэлээс хамгаалж асан нөгөө хэддээ ч бас ёсолъё. Эрүүл байвал...” хэмээсэн байлаа. Үүнийхээ дараахан мөн "Олон жиргээнд баярлав. Жиргээд хоёр жил болж. Бид шувуу биш. Гэхдээ л жиргэнэ. Сэтгэх чадвар шувуунаас биднийг ялгана. Шорон дээгүүр шувууд нисдэггүй гэдэг худлаа. Ниснэ.Тагт дээр сууна. Бид талхаа илүүчилнэ. Харилцан жиргэнэ. Бас ч гэж ойлголцоно.Сэтгэдэг нь бүр илүү ойлголцох ёстой биз" гэсэн байна.

У.Тэргэл