Коронавирусний халдвараас шалтгаалж сүүлийн хагас жил Замын-Үүдийн гааль дээр нөхцөл байдал хүндэрч бараа, материалын хэт их бөөгнөрөл үүссэн. Үүнээс үүдэж БНХАУ-аас орж ирэх бараа материал хомсдож, дотоодод үнийн хэт их хөөсрөл бий болсон юм. БНХАУ-ын талаас “Халдвар хамгаалалт, ариутгал хангалтгүй байна. Илүү сайжруул” гэсэн шаардлагыг тавьсан. Харин манайх хэдэн төмрийг ногоон гялгар уутаар бүрхэж, түүнийгээ 160 саяын өртөгтэй ариутгалын хаалга гэж нэрийдэн ажиллуулж байсан юм. Ямар сайндаа л хаалгыг харсан Ерөнхий сайд нь уулга алдан хэлэх үггүй болж, толгойгоо маажиж зогсох вэ.

Сиймгэр, навсгар ариутгалын хаалгыг Замын-Үүд сумын Хилийн мэргэжлийн хяналтын газрынхан хариуцан хийлгэсэн ба улсын мөнгөөр биш сумынхаа нөөц хөрөнгөөр бариулсан хэмээн МХЕГ-ын дарга Т.Гантулга хээвнэг тайлбарлаж зогссон.

Харин шинээр томилогдсон Бүрэн эрхэт төлөөлөгчид Замын-Үүдийг эн тэргүүнд эко бүс болгохын тулд “Нэг өрх-нэг шинжилгээ”-г хийсэн ба хоёрдугаарт, сиймгэр ариутгалын хаалгыг зориулалтын хаалгаар сольж эхэлжээ. Эхний ээлжид Монголоос гарах буюу экспортын ариутгалаа хаалгаа суурилуулж эхэлсэн байна.

Одоогийн суурилуулж буй ариутгалын хаалганы зах зээлийн дундаж ханш 43 сая төгрөгийн үнэтэй юм байна.

У.Тэргэл