ЭМЯ-ны ээлжит мэдээллийн үеэр ХӨСҮТ-ийн захирал Л.Баттөр, тус яамны Нийтийн эрүүл мэндийн тусламжийн бодлого, хэрэгжилтийг зохицуулах газрын дарга Л.Энхсайхан нар сэтгүүлчийн асуултад хариулж, дараах мэдээллийг өглөө.
-Вакцины бүрэн тунд хамрагдсан хүн бүрд эсрэг биет үүсэх үү?
-Халдвараар өвдөөд эдгэрсэн хүн бүрд эсрэг биет тогтоно гэж байхгүй. Вакцины бүрэн тундаа хамрагдсан иргэдэд ч мөн адил шууд эсрэг биет тогтохгүй. Иргэд үүнийг маш сайн ойлгох хэрэгтэй. Хүмүүс дархлаажуулалтад хамрагдаад л халдвар авахгүй мэтээр бодож байна. Нийтийн, сүргийн дархлаа үүсэх болоогүй. Вакцинд хамрагдаагүй 0-11 насны хүүхдүүд өнөөдөр халдвараар өвдөх өндөр эрсдэлтэй байна. Нэг хүний гэхээс илүүтэй нийтээр вакцинаа хийлгэсэн тохиолдолд дархлаа тогтох боломжтой.
-Хичээл сургалтын үйл ажиллагааг есдүгээр сарын 1-нээс эхлүүлэх боломж бий юү. ЭМЯ-нас энэ талын судалгаа хийж байгаа юу?
-Өнөөдрийн байдлаар 204 мянга гаруй хүүхдийг вакцинд хамруулаад байна. Үүнээс 12-15 насны 141 мянга, 15-17 насны 62 мянган гаруй хүүхэд дархлаажуулалтад хамрагдсан. Халдварын тархалтаас урьдчилан сэргийлж, нийт хүүхдийг вакцины бүрэн тунд хамруулах, хичээлийг аль болох танхимаар оруулахыг зорьж, төлөвлөж ажиллаж байгаа.
-Нийт хүн амын дунд дельта вирус тархсан гэсэн. Үүний эсрэг ямар арга хэмжээ авч байна вэ?
-Хүн амын дунд альфа хувилбар тархсаныг шинжилгээгээр баталсан. Дельта хувилбар ч мөн батлагдаад байгаа. Хөл хөдөлгөөний хязгаарлалт тогтоож, вакциныхаа бүрэн тунг хийлгэж чадвал цар тахалд өртөхөөс урьдчилан сэргийлж чадна. Мутацад орсон хэлбэр тархаж байгаа. Баяр наадмын өдрүүдэд нийслэлээс орон нутгийг зорих иргэд нэмэгдэж, халдварын зөөвөрлөгдсөн тохиолдол тархсан байж болно. Тиймээс иргэн бүр халдвар хамгаалалтын дэглэмийг сайтар баримтлах хэрэгтэй байна.
-Өнөөдрийн байдлаар хэчнээн жирэмсэн эхийг дархлаажуулалтад хамруулаад байна вэ?
-Жирэмсэн эхчүүдийн дархлаажуулалт эхэлснээс хойш 5300 орчим хүнийг хамруулаад байна. “Covid-19” халдвар авсан тохиолдолд жирэмсэн эмэгтэйчүүдийн биеийн байдал богино хугацаанд хүндрэх эрсдэлтэй.